O'zbekiston xokkey federaciyasi rahbari Moskvada KXL prezidenti bilan uchrashdi

Uchrashuv chog'ida mazkur sport turini O'zbekistonda yanada rivojlantirish chora-tadbirlari muhokama qilindi.

Ayni paytda O'zbekiston rahbariyati tashabbusi bilan mamlakatimizda birinchi professional muz saroyi – “Humo Arena” qurib bitkazilmoqda. O'zbekistonning turli hududlarida zamonaviy muz maydonchalari qurilmoqda.

Xokkey dunyoda keng tarqalgan sport turlaridan biri sanaladi. Bugun O'zbekistonda sportning ushbu turiga qiziqish tobora ortib bormoqda. Qisqa fursatda mazkur sport turini yuksak darajada rivojlantirish, bu borada ulkan yutuqlarga erishgan Rossiya xokkey maktabi tajribasidan unumli foydalanish katta ahamiyatga ega.

Tomonlar strategik hamkorlikni yo'lga qo'ygan bu ikki mamlakatda xokkeyni yanada rivojlantirish, yangi muz saroyida ikki mamlakat sportchilari o'rtasida bellashuvlar tashkil etish bo'yicha kelishib oldilar.

Muzokaralar chog'ida qisqa fursatda o'zbekistonlik xokkeychilar xalqaro maydonda o'zining munosib o'rnini topa olishiga ishonch bildirildi, deya xabar beradi O'zbekiston Xokkey federaciyasi matbuot xizmati.