O'zbekistonda “Olympic Day” boshlandi!

XOQ qaroriga ko'ra, barcha mamlakatlar ushbu bayramni 23 iyun kuni atrofida nishonlashlari mumkinligi belgilangan. O'zbekistonda 2020 yilgi Olimpiya kuni bugun nishonlanmoqda. Asosiy bayram tadbiri bugun o'tkazilsada, ushbu kun shukuhi bir necha kun muqaddam boshlangan. Jumladan, 15 iyundan virtual yugurish dasturi yo'lga qo'yilib, unda hozirgacha 500 nafarga yaqin hamyurtimiz o'z omadini sinab ko'rishdi.

Ijtimoiy tarmoqlarda ham “Olimpiada – bu . . .” loyihasi yo'lga qo'yilib, unda taniqli o'zbek sportchilari va minglab muxlislarimizni jalb qildik.

Ayni paytda butun dunyo koronavirus pandemiyasi tasiri ostida bo'lgani bois bu yilgi bayram barcha mamlakatlarda onlayn tarzda qarshi olinmoqda. SHu jumladan, diyorimizda ham.

Odatga ko'ra, ushbu sanada yugurish va boshqa turli sport musobaqalari, jismoniy mashg'ulotlar bajarilib, bu orqali barcha sog'lom turmush tarziga targ'ib qilinadi. Bugun erta tongda Milliy olimpiya qo'mitasi, Jismoniy tarbiya va sport vazirligi, Olimpiya sport turlari bo'yicha federaciya va associaciyalar xodimlari, sportchi va murabbiylar ushbu kun doirasida birgalikda badantarbiya mashqini bajarishdi.

Bugungi bayram dasturi shu bilan nihoyasiga etmaydi, albatta. Kun davomida Olimpiya o'yinlari va jahon chempionatlarida shohsupaga ko'tarilgan o'zbek sportining yorqin vakillari ishtirokida asosiy tadbir onlayn tarzda o'tishi belgilab qo'yilgan.