O'zbekistonlik Olimpiada sovrindorining sobiq raqibida koronavirus aniqlandi

Kubalik chempion shu yilning mart oyi boshida Kanadaning Ottava shahrida o'tkazilgan Panamerika chempionatida ishtirok etgan va yakunda -67 kg vazn toifasida musobaqa g'olibiga aylangandi. 

CHempionat yakunlanganidan so'ng Kuba terma jamoasi Ottavada qolib, bir haftadan keyin Kanadaning aynan shu shahrida start oladigan Panamerika kvalifikacion turniriga tayyorgarlik ko'rdi. Borero o'tgan yili Nur-Sultan shahridagi jahon chempionatida Tokio-2020 licenziyasini qo'lga kiritgani bois bu musobaqada ishtirok etmadi. 

Kubalik kurashchilar 17 mart kuni Kanadadan Ozodlik oroliga qaytishdi va shundan so'ng Ismaelda infekciya simptomlari aniqlandi. 28 mart kuni esa uning koronavirusga topshirgan tahlili ijobiy natija berdi. Hozirda Borero poytaxt Gavanadagi gospitalda davolanmoqda. Olimpiada chempionining holati qoniqarli deya baholanmoqda. 

Ismael Borero bilan muloqot qilgan 25 kishi nazoratga olindi. Ular orasida yunon-rim kurashi bo'yicha Kuba terma jamoasining to'rt nafar azosi ham bor. Ularning barchasi shifokorlar nazoratiga olingan. 

Eslatib o'tamiz, Ismael Borero Rio-2016 Olimpiadasining yarim finalida hamyurtimiz Elmurat Tasmuradovni mag'lubiyatga uchratib, finalga yo'l olgan edi.