"Pantera Sport" nomiga munosib bo'lishga intilmoqda

Bugun biz poytaxtimizdagi "Pantera Sport" ("Pantera Sport") klubi haqida hikoya qilamiz. Ushbu dzyudo to'garagiga 2013 yilda Komil Tojiev tomonidan asos solingan. Klub tarbiyalanuvchilari o'tgan davr mobaynida yurtimiz hamda xorijda o'tgan musobaqalarda g'olib va sovrindorlar safidan joy olishga muvaffaq bo'lgan. Biz ayni mavzuda klubi murabbiyi Bobur Rizaevdan intervyu oldik.   

- Bobur, suhbatimiz avvalida "Pantera Sport" klubining tashkil etilishi haqida malumot bersangiz. 

- Klubimiz 2013 yilda Komil aka Tojiev tomonidan tashkil etilgan. Hozirda ular klub direktori hisoblanadilar. Asosan mahalliy yoshlarni dzyudo sport turiga qiziqtirish, ularning bo'sh vaqtlarini mazmunli tashkil etish asosiy maqsadimiz bo'lgan. Endilikda ommaviylikdan natija uchun harakat qilyapmiz.  

- Klub ochilganiga etti yil bo'libdi. O'tgan vaqt davomida qanday natijalarga erishdinglar?

- Ustozimiz Komil Tojiev va katta murabbiyimiz SHuhrat Abdurasulov ungacha ham dzyudoda ishlashgan. Ular Markaziy Harbiy Sport Klubida Osiyo chempioni va sovrindorlari, Respublika miqyosidagi musobaqalar g'olib hamda sovrindorlarini etishtirib chiqarishgan. Bu borada katta tajribalari bor. Keyin birgalikda "Pantera Sport" klubiga asos solishdi. Men esa 2015 yildan to shu kungacha ushbu klubda murabbiy sifatida faoliyat yuritib kelyapman. 

- O'zingizning sportchilik faoliyatingiz qanday bo'lgan? SHogirdlaringizning natijalari ko'ngildagidekmi?

 - Yoshlar va kattalar o'rtasida o'tkazilgan O'zbekiston chempionatlarida g'olib va sovrindor bo'lganman. Rossiya, Qozog'iston, Indoneziya davlatlarida bo'lib o'tgan xalqaro musobaqalarda shoxsupaga ko'tarilganman. 2017 yilda sportchilik faoliyatim yakunlangan. O'sha yili Indoneziyaning Bali orolida o'tgan Bali Open xalqaro turnirida shogirdlarim qatorida ishtirok etib, oltin medalni qo'lga kiritgan edim. O'sha turnirda bolalar o'rtasida shogirdlarimdan -36 kg vazn toifasida Yusufjonov Usmonjon ham chempion bo'lgan. SHuningdek, 2018 va 2019 yillarda Indoneziyaning Penang va Jakarta shahralarida o'tkazilgan xalqaro musobaqalarda 7 ta oltin, 2 ta kumush, 3 ta bronza medallarini qo'lga kiritdik. SHu yil fevral oyida Samarqand shahri mezbonlik qilgan xalqaro musobaqada 3 ta bronza medaliga ega bo'ldik. Qirg'iziston poytaxti Bishkek shahrida o'tgan Jangarach-Viy Open turnirida esa shogirdimiz Husanboev Abdulloh chempionlik shohsupasiga ko'tarildi. Bundan tashqari, klubimiz azolari o'smirlar hamda yoshlar o'rtasidagi Respublika turnirlarida g'olib va sovrindor bo'lib kelishyapti. 

- Bugungi kunda necha nafar bola shug'ullanyapti?

- Klubimizda 100 nafardan ziyod bolalar dzyudo sir-asrorlarini o'rganishyapti. Ular orasida qizlarimiz ham bor. Yaqin kunlarda shahrimizning boshqa tumanlarida ham klubimiz filiallarini ochish rejalashtirilgan. Fursatdan foydalanib, nafaqat dzyudo, balki boshqa sport turlariga ham etibor qaratayotgan, sharoitlar yaratib berayotgan davlatimizga, Jismoniy tarbiya va sport vazirligiga, O'zbekiston Milliy olimpiya qo'mitasi va dzyudo federaciyasi rahbariyatiga minnatdorchilik bildiraman.