Para suzish: Berlinda 6 ta medalga sazovor bo'ldik

Kecha musobaqaning so'nggi kunida sportchilarimiz bir nechta medallarga sazovor bo'ldi. Jumladan, ayollar o'rtasida 200 metr masofaga kompleks usulda suzish bahslarida ishtirok etgan SHohsanamxon Toshpo'latova 02:28.31 daqiqa vaqt bilan oltin medalni qo'lga kiritdi. Etiborlisi, u Tokio-2020 yozgi Paralimpiya o'yinlarida jami 6 ta, yani 50 metr erkin, 400 metr erkin, 100 metr batterflyay, 100 metr chalqancha, 100 metr brass va 200 metr kompleks usulida suzish bahslarida kurash olib boradi.

Erkaklar o'rtasida 200 metr kompleks usulda suzish bo'yicha startga chiqqan Firdavsbek Musabekov 02:20.13 daqiqa natija ko'rsatib, yakunda kumush medalga sazovor bo'ldi. U Tokio-2020 yozgi Paralimpiya o'yinlarida 100 metr brass va 200 metr kompleks usullarida suzish bahslarida yurtimiz sharafini himoya qiladi.

Bugun shuningdek, erkaklar o'rtasida 50 metr erkin usulda suzish bo'yicha hamyurtimiz Islam Aslanovga teng keladigan raqib topilmadi. U oltin medalga sazovor bo'lishi uchun 00:24.67 soniya natija qayd etdi. Aslanov Tokio-2020 yozgi Paralimpiya o'yinlarida 50 metr erkin, 100 metr batterflyay va 100 metr chalqancha usulda suzish bo'yicha bahslarda ishtirok etadi.

Bundan tashqari, erkaklar o'rtasida 100 metr masofaga chalqancha suzish bo'yicha o'tkazilgan bahslarda yana bir hamyurtimiz Muzaffar Tursunxo'jaev 01:06.24 daqiqa vaqt bilan kumush medalga sazovor bo'ldi. Muzaffar Tokio-2020 yozgi Paralimpiya o'yinlarida 50 metr erkin, 100 metr chalkancha va 100 metr batterflyay usullarida bahslarda qatnashadi.

Eslatib o'tamiz, Jahon seriyasining dastlabki kunida 100 metr masofaga batterflyay usulida suzish bo'yicha ayollar o'rtasida SHohsanamxon Toshpo'latova oltin, erkaklar o'rtasida esa Muzaffar Tursunxo'jaev bronza medaliga sazovor bo'lgan edi. Para suzuvchilarimiz Berlindagi musobaqadan 3 ta oltin, 2 ta kumush va 1 ta bronza, jami 6 ta medal bilan qaytmoqda.