Pimblett Jared Gordon bilan revansh jangini o'tkazish niyatida

Engil vazn toifasida britaniyalik UFC jangchisi Peddi Pimblett amerikalik Jared Gordonga qarshi revansh jangini o'tkazish istagi borligini malum qildi.

"Odamlar Gordonning yaxshi jang qilganini aytmoqda. Lekin u buni jarohat olganim tufayligina amalga oshira oldi. Endi u o'zini xafa qizdek tutib, har bir intervyusida g'alaba qozongani haqida gapiryapti. Yil so'nggida uning yuziga musht tushirmoqchiman. Umid qilamanki, u Bobbi Grinni mag'lub etadi, shunda men uning tazirini berishim mumkin bo'ladi. Men o'sha paytda og'ir ahvolda edim, lekin u shu holatda ham meni mag'lub eta olmadi. Hatto jarohat olgan holatimda ham", - dedi Pimblett.

Pimblettning Jared Gordonga qarshi jangi 2022 yil dekabr oyida UFC 282 turniri doirasida bo'lib o'tgan edi. Mazkur jang to'liq davom etib, Peddi Pimblett foydasiga yakunlangan edi.

Malumot uchun, Jared 22 aprel kuni UFC Fight Night 222 turnirida Bobbi Grin bilan to'qnash keladi.