Piyoda yurgan insondan xastaliklar yiroq bo'ladi

Ayniqsa, so'nggi yillarda kasalliklar bilan kurashish emas, balki aholining tibbiy va sanitar-gigienik madaniyati darajasini yuksaltirish hamda tizimli profilaktikaga jiddiy ahamiyat berilmoqda.

Jizzax shahrida tashkil etilgan navbatdagi sog'lomlashtirish tadbiri ham ana shu ezgu maqsadga xizmat qiladi. 1 dekabr – Xalqaro OITSga qarshi kurash kuniga bag'ishlangan ushbu tadbirni o'tkazishda viloyat sog'liqni saqlash hamda jismoniy tarbiya va sport boshqarmalari, Milliy gvardiya, Ichki ishlar boshqarmasi hamda qator manfaatdor tashkilotlar hamkorlik qilishdi.

SHu kuni tashkil etilgan «Salomatlik uchun 5 000 qadam» akciyasini o'tkazishdan ko'zlangan bosh maqsad – aholi o'rtasida sog'lom turmush tarzini keng targ'ib qilishdan iborat edi. Aytish kerakki, tashkilotchilar maqsadiga erishdi.

Tadbirda so'zga chiqqanlar asosan sog'lom turmush tarzini shakllantirish, odamlarni ko'proq dori emas, balki to'g'ri ovqatlanishga, sportga o'rgatish lozimligini takidlashdi. SHuningdek, har kim avvalo o'zining salomatligi uchun hech bo'lmaganda kuniga 5 ming qadam piyoda yurishi borasida ham zarur tavsiyalar berildi.

Darvoqe, piyoda yurish turli kasalliklarning kelib chiqishini oldini olibgina qolmasdan inson umrining uzayishiga ham xizmat qiladi. SHunday ekan, har birimiz kuniga kamida 10 ming qadam yurishga odatlanmog'imiz kerak. O'shanda turli dard va xastaliklar bizdan yiroq bo'ladi.