Qamashida taekvondo bo'yicha musobaqa o'tkazildi FOTOGALEREYA

Mazkur musobaqada Qarshi va SHahrisabz shaharlari, Kitob, G'uzor, Yakkabog' hamda Qarshi tumanlaridan 250 nafardan ortiq yosh sportchilar 40 ta vazn toifasida tatamida o'z mahoratlarini sinovdan o'tkazishdi.

Dastavval, O'zbekiston Respublikasi Milliy gvardiyasi Qashqadaryo viloyati qo'rqlash boshqarmasi 4-alohida otryadi komandiri podpolkovnik Zafar Ibragimov musobaqa tashilotchilariga o'z minnatdorchiligini bildirib, sportchilarga omad tiladi.

SHundan so'ng, Qashqadaryo viloyati taekvondo-do (WT) milliy federaciyasi raisi SHavkat Murodov hamda tuman hokimligi bosh mutaxassisi SHerbek Soatovlar ham so'zga chiqib, viloyatda, xususan Qamashi tumanida mazkur sport turini yanada rivojlantirish maqsadida olib borilayotgan ishlar yuzasidan o'zlarining ijobiy fikrlarini bildirib o'tdilar.

Bundan tashqari 2-Bolalar-o'smirlar sport maktabi direktori vazifasini bajarib turgan Bekzod SHoto'raev ham musobaqa haqida o'z fikrlarini bildirdi. SHundan so'ng bahslarga start berildi.

Qiziqarli kechgan bellashuvlarda umumjamoa hisobida Qamashi tuman 2-sonli Bolalar-o'smirlar sport maktabi jamoasi yosh sportchilari birinchi o'rinni qo'lga kiritgan bo'lsa, kuchli uchlikdan Qarshi shahrining “Tornado” sport klubi hamda Kitob tuman pedagogika sport kolleji jamoalari joy oldi.

Musobaqa yakunida so'z olgan g'oliblardan biri, qator musobaqalar g'olib va sovrindori Jaloliddin Normurodov sportchilar uchun yaratilib berilayotgan sharoitlar uchun avvalambor, Muhtaram Prezidentimizga, qolaversa O'zbekiston Respublikasi Jismoniy tarbiya va sport vazirligi, Qamashi tuman 2-sonli bolalar-o'smirlar sport maktabi mamuriyatiga o'z minnatdorchiligini bildirib, kelajakda ushbu g'amxo'rlik va etiborga munosib javob qaytarishga vada berdi.

Faxriddin CHoriev, saytimizning Qashqadaryodagi muxbiri