Qarshi IOZMI direktori o'zi o'qigan maktabga kitoblar sovg'a qildi

Prezidentimiz tomonidan ilgari surilgan ushbu xayrli tashabbus tufayli endilikda mansabdor shaxslar, ziyolilar, ishchi xodimlar o'zlari taxsil olgan umumiy o'rta talim maktablariga kitoblar sovg'a qilishmoqda. 

Xususan, Qarshi ixtisoslashtirilgan olimpiya zaxiralari maktab-internati direktori Normahmat Jalilov ham o'zi tahsil olgan Qamashi tumani Novobod qishlog'idagi 12-umumiy o'rta talim maktabi kutubxonasiga o'zbek milliy hamda jahon adabiyoti namoyandalarining sara asarlaridan iborat 100 dona kitob sovg'a qildi. 

- Biz maktabimizda bilim olib, keyinchalik jamiyatimizda, el orasida nafi tegadigan, elda ezoz topgan bitiruvchilarimiz bilan faxrlanamiz, - dedi maktab kutubxonachisi SHoira SHodmonova. - Maktabimiz kutubxonasiga jismoniy tarbiya va sportni viloyatimizda rivojlanishida hissa qo'shib kelayotgan, taniqli ustoz-murabbiy, jonkuyar rahbar, Navro'z tantanalari, to'y va sayillarda o'tkaziladigan, milliy sport turimiz bo'lgan kurash davralarini bosh hakam, bosh bakovul sifatida doimo odillik va halollik bilan boshqaradigan Normahmat akaning sara adabiyotlar sovg'a qilishi o'quvchilarimizning kitobga yanada mehr qo'yishi va shu orqali tasavvur olami, dunyo qarashi kengayib, manaviyati shakllanishi bor gap.

Ilhom RAHMONOV tayyorladi