Qashqadaryo viloyati sporti boshlig'i rekord o'rnatdi

Qashqadaryo viloyat hokimligi, viloyat jismoniy tarbiya va sport boshqarmasi hamda bir qator tashkilotlar hamkorligida o'tkazilgan musobaqada dastlab, marafon yugurishida viloyatdagi umumtalim maktablari o'quvchilari, oliy o'quv yurti talabalari, harbiy xizmatchilar, tashkilot va korxonalarning ishchi xodimlaridan jami ikki minga yaqin ishtirokchilar belgilangan masofani bosib o'tishdi. 

Tosh ko'tarish bahslari esa o'ziga xos sport bayramiga aylanib ketdi. Bir-biridan kuchlilar o'z mahoratini amalda nomoyon eta boshlashdi. Musobaqa shartiga ko'ra, ikkita 16 kg toshni ikki qo'lda birdaniga kim ko'p ko'tara olish edi. Bunda sportchilar, murabbiylar hamda harbiy xizmatchilar o'zlarini sinovdan o'tkaza boshlashdi. 

Kimdir o'ttiz besh marotaba, kimdir yigirma, yana kimdir o'ttiz marta ko'tara oldi. Eng ko'p ko'targan esa qirqtaga etkazdi. Polvonlarning harakatlarini kuzatib turgan Qashqadaryo viloyat jismoniy tarbiya va sport boshqarmasi boshlig'i Sirojiddin Odilov ham musobaqaga qo'shildi. U boshqalarga o'rnak bo'larli darajada - 16 kg toshni ikkala qo'lda 61 marotaba ko'tarib, musobaqa rekordini o'rnatdi hamda birinchi o'rin g'olibi bo'ldi.

Musobaqa so'ngida g'olib va sovrindorlar Qashqadaryo viloyat hokimligi, Qashqadaryo viloyat jismoniy tarbiya va sport boshqarmasi tomonidan munosib taqdirlandi.

Akbar RAHMONOV tayyorladi