Qilichbozlik. Paola va boshqa sportchilarimiz yakkalikda medal qo'lga kirita olishmadi, bugun jamoaviy bahslar tashkil etiladi

Avvalroq, sablya yo'nalishidagi bahslarda o'zbekistonlik qilichbozlar ham ishtirok etishlari haqida xabar qilgandik. 

Hozircha musobaqa doirasida yakkalik bellashuvlari yakunlandi. Unga ko'ra, Zaynab Dayibekova saralash (pulka) bahslaridayoq imkoniyatni boy bergan bo'lsa, Sevinch Ismoilova, shuningdek legioner qilichbozlarimiz Paola Pliego hamda Yana Obvinceva asosiy davradagi ilk janglaridayoq mag'lubiyatga uchrab, yakkalik bahslarida ishtiroklariga yakun yasashdi. 

Malumot o'rnida, pulka bahslarida sportchilar guruhlarga bo'lingan holda 5 ta yoki 6 ta jang o'tkazishadi. Ushbu janglarda yaxshi natija qayd eta olgan sportchilar asosiy davraga yo'l olishadi. Asosiy davra esa olimpiya tizimida tashkil etiladi.

Bugun musobaqa doirasida jamoaviy bellashuvlar tashkil etiladi. O'zbekiston sharafini himoya qiluvchi qizlarimiz ilk bosqichda Germaniya terma jamoasi bilan to'qnash kelishadi. Agar qilichbozlarimiz ushbu jangni o'z foydalariga hal qila olishsa, keyingi bosqichda ularga Hindiston yoki Vengriya terma jamoalaridan biri raqiblik qiladi.