Qirg'iz Respublikasi prezidenti Akmal Hasanovga avtomobil sovg'a qildi FOTO

Mamlakat rahbari qirg'izistonlik Munarbek Seyitbek o'g'lining Parij-2024 Olimpiadada sovrindor bo'lishiga qo'shgan hissasi uchun Akmal Hasanovga Chevrolet Tracker avtomobilini sovg'a qildi.

Japarov o'zbek murabbiyining bu harakati Qirg'iziston va O'zbekiston xalqlarining do'stligi va hamjihatligini ko'rsatib berganini alohida takidlagan.

“Markaziy Osiyo xalqlari bir-birini qo'llab-quvvatlab, birdamlik va do'stona munosabatlarni namoyon etayotganini butun dunyo ko'rdi”, – deya uning so'zlarini keltirmoqda qirg'iz prezidenti matbuot xizmati.

Sadir Japarov Parijdagi olimpiadada o'zbekistonlik sportchilar yuqori natija qayd etganini ham takidlagan. “O'zbekistonda sportga katta etibor qaratilmoqda. Biz sportchilarimizni so'nggi uch yil ichida faol qo'llab-quvvatlay boshladik. Avvallari musobaqalarda ishtirok etish uchun mablag' ajrata olmagan holatlarimiz bo'lgan. Hozir davlat vitaminlar bilan taminlashgacha bo'lgan barcha zarur sharoitlarni yaratyapti”, – degan davlat rahbari.

Akmal Hasanov qo'shni mamlakat rahbariga minnatdorchilik bildirib, Munarbek Seyitbek o'g'lini sport yig'inlarida ko'p marta uchratgani, Parijda hech ikkilanmay uning treneri bo'lishga rozilik bildirganini takidlagan.

Eslatib o'tamiz, qirg'izistonlik bokschi Munarbek Seyitbek o'g'li Parij olimpiadasidagi kumush medali bilan, Qirg'iziston boksi tarixidagi ilk olimpiada sovrindoriga aylangan edi. Uning o'z murabbiyi viza muammosi sababli olimpiadaga bora olmagani sabab, nimchorak, chorak va yarim final janglarida unga Akmal Hasanov sekundantlik qildi.