Bunyod Hasanov U17 yosh toifasida ikki karra jahon chempioni! Yana bir kurashchimizda bronza + FOTO

Yunon-rum kurashi bo'yicha kechayotgan dunyo birinchligining ikkinchi kungi bellashuvlari ham O'zbekiston o'smirlar terma jamoasi uchun muvaffaqiyatli keldi. 51 kg vazn toifasida yurtimiz sharafini himoya qilgan Bunyod Hasanov yo'lidan chiqqan barcha raqiblarini yaqqol ustunlik bilan mag'lubiyatga uchratib, ikki karra jahon chempioni degan yuksak nomga sazovor bo'ldi. 16 yoshli iqtidor egasi o'tgan yili Greciyada o'tgan jahon chempionatida ham o'zidan kattalar bilan kurashib, oltin medalni qo'lga kiritgandi.

Bu safar u avvaliga rossiyalik Artyom Tkachenkoni 10:2, 1/4 finalda ukrainalik Denis Kirikni 6:2, 1/2 finalda moldovalik Vadim Tarelungani 10:0, hal qiluvchi final bellashuvida esa mezbonlar vakili Abdurahmon Huseynlini 9:0 hisobida mag'lubiyatga uchratdi. 

Terma jamoamizning 60 kg vazn toifasidagi vakili Sadriddin To'lqinboev 3-o'rin uchun kechgan bahsda ruminiyalik Aleksandru Ilie Lunguni 10:2 hisobida engib, jahon chempionatining bronza medaliga sazovor bo'ldi. Bronza medali uchun gilamga chiqqan qolgan ikki kurashchimiz Afruzbek Ibragimov (45 kg) rossiyalik Arslan Alievga 0:10, Mirjalol SHavkatov (92 kg) esa eronlik Amirreza Mehritalarposhtiga 3:4 hisobida imkoniyatni boy berib qo'ydi. 

SHu tariqa, yunon-rum kurashi bo'yicha O'zbekiston terma jamoasi 1 ta oltin, 2 ta bronza medali bilan jahon chempionatidagi ishtirokini yakunladi. Musobaqaning birinchi kuni Abdulaziz Xolmirzaev (80 kg) terma jamoamizga bronza medalini taqdim etgan edi.