Qizlarimizdan Umida Omonova kuchli beshlikda!

Bugun rapid yo'nalishi bo'yicha o'tkazilgan 4 ta turning 3 tasida g'alaba, 1 tasida durang qayd etgan Umida Omonova o'zbekistonlik shaxmatchilar orasida kunning eng yaxshi natijasini ko'rsatdi. Yaqindagina yoshlar o'rtasida blic yo'nalishida Osiyo chempioni bo'lgan Omonova 3,5 ochko bilan 5-o'rinni egallagan holda peshqadamdan yarim ochkoga ortda qolmoqda. 

Hindistonlik Hampi Koneru, ukrainalik Anna Muzichuk, rossiyalik Valentina Gunina, Katerina Lagno singari jahon chempionlari 4 imkoniyatdan 3 ochko jamg'arishdi. Hindistonlik yana bir jahon chempioni Harika Dronovalli esa 2 ochko bilan 48-pog'onada bormoqda. Yaqindagina 14 yoshgacha shaxmatchilar orasida jahon chempioni bo'lgan Afruza Hamdamova 2 ochko bilan 49-o'rinni egallab turibdi. 

AQSH sharafini himoya qilayotgan hamyurtimiz Gulruhbegim Tohirjonova 3,5 ochko bilan 4-o'ringa joylashdi. Uch opa-singil grossmeysterlarning kenjasi hisoblangan Gulruhbegim 3 g'alaba va 1 durang qayd etdi. Bolgariyalik Nurgyul Salimova va xitoylik Ju Jiner yuz foizlik natija - 4 ochkodan jamg'arib, turnir jadvalida qo'shhokimlik qilishyapti. Ertaga rapid bo'yicha bahslar davom ettiriladi. 

Suratda Gulruhbegim Tohirjonova (AQSH)