Qorovullikdan milliarderlikkacha yoxud 50 yoshni qarshilagan Dana Uayt haqida

Bolalik davri

Dana Uayt - 1969 yilning 28 iyul kuni AQSHning Konnektikut shtati Manchester shahrida tug'ilgan. Uayt otasidan juda erta ayriladi. Onasi esa ikki bolani boqish uchun tinmay ishlashga majbur bo'lgan. Bo'lajak magnatning yoshligi asosan Las-Vegas ko'chalarida o'tadi. Dana 1987 yili ancha nufuzli hisoblangan Boston kollejiga o'qishga kirdi. Uaytning yoshlikdan maqsadi pul topish bo'lgan. U kollejda o'qib yurgan kezlariyoq tungi klublarda qorovullik qilgan va parallel ravishda boks bilan jiddiy tarzda shug'ullangan. Lekin bu holat yaxshilikka olib kelmadi. Pul hamda boksga berilib ketgan Dana ikkinchi bosqichda kollejdan chetlatiladi.

Yashash uchun kurash

Taxsilni yig'ishtirgan Dana bir vaqtning o'zida qorovullik qilgan, barmen bo'lib ishlashgan va havaskor boks bilan shug'ullangan. Lekin boksdagi faoliyat o'qish singari uzoqqa cho'zilmadi. O'zining imkoniyatlarini to'g'ri anglab etgan Uayt boksni tashlashga qaror qiladi.

"Men hech qachon ringda jang qilishdan qo'rqmagan. Lekin hayotga real ko'z bilan qarardim. 35-37 yoshdagi havaskor bokschiga sport hech narsa bermagan. Men ana shunday toifadagi bokschilarga o'xshab qolishni istamaganman", - deya izoh bergan Dana boksni tashlashi haqidagi savolga.

Dana endi aerobika sport turi bo'yicha murabbiylik qilishni boshladi. Ammo, bu ham uning kelajagi emasligini tez orada anglab etdi. SHu bois bo'lsa kerak, 1992 yili murabbiylarni tayyorlaydigan uchta sport zali ochishga qaror qildi va ularga “Dana White Enterprises” nomini berdi. O'zini ancha o'nglab olganidan so'ng, u endi promouterlik kompaniyasini ochish haqida o'ylay boshladi. Bu yo'lda avvaliga kuchli jiu-jitsu ustalarini topdi va ularga keraklikcha yordam berishga harakat qildi. Lekin kutilmaganda uning ishlari ortga ketishni boshladi, barcha sport zallari bankrotga uchradi. SHundan so'ng, Dana yana o'z omadini Vegasdan izlashga qaror qildi. 

U erda eski do'sti Lorenco Fertittani topdi. Ular maktabda birga o'qishgandi. Lorenco akasi Frenki singari boks shinavandasi edi. Uayt yana boks olamiga kirishga intildi, lekin unda pul yo'q edi. O'ylab-o'ylab yosh iqtidorlarni qidirishga va ularning menejeri bo'lish orqali pul ishlashni boshladi. Tez orada bu uchlik butun MMA dunyosi nigohini o'ziga qarata oldi. Ularning mehnatsevarligi barchaga o'rnak bo'la boshladi. Dananing omadi kelayotgan bir paytda UFCga egalik qiluvchi kompaniya Semaphore Entertainment Group bankrot yoqasiga kelib qoladi. Vaziyatdan unumli foydalanib qolish maqsadida Dana va aka-uka Fertittalar UFCni sotib olishga qaror qilishdi. Ular 2001 yilning yanvarida Semaphore Entertainment Groupdan UFC promoushenini sotib olishga erishishdi. Aka-uka Fertittalar Uaytni UFC prezidenti qilishga qaror qilishdi.

UFC prezidenti

Uayt UFCga kelishi bilan birinchi qilgan ishi promoushening brendini ko'tarish bo'ldi. U dastlab UFCga rasmiy maqom berishga erishish lozimligini malum qildi. Lekin AQSH shtatlari rasmiylari unga bu maqomni bermaslikka intilishdi. Ular UFCni vahshiylik deb atashgan. Dana bunday emasligini isbotlash maqsadida UFCga bir nechta qoidalar olib kirdi va shu tariqa rasmiy maqomni olishga erishdi. Dana marketingga jiddiy etibor qaratdi. U Spike TV bilan janglarni jonli namoyish etish bo'yicha shartnoma imzoladi. UFCning ilk davrdagi yulduzlari - Tito Ortis, CHak Liddell, Mett Xyuz bo'lishdi. 

2005 yilda Dana sheriklari bilan Spike TVda “Dana White Enterprises” realiti shousini namoyish etdi. Bu realitida 16 UFC jangchi bir-biri bilan jang qilgan. Mag'lub bo'lmagan Forrest Griffin va Stefan Bonnar hal qiluvchi final jangini o'tkazdi. Ushbu bahsni jonli efirda bir milliondan ko'proq muxlis tomosha qiladi. Bu esa UFC uchun o'sha davrlarda rekord natija edi. SHu tariqa UFCning MMA dunyosidagi obro'si kundan-kunga oshib bordi. Dananing o'zi esa 2006 yili “Yil promouteri” sovrinini qo'lga kiritdi. 2016 yili Dana aka-uka Fertittalardan barcha akciyalarni sotib oladi hamda yolg'iz o'zi UFC rahbariga aylanadi. Tashkilotni Dana "WME-IMG" kompaniyasida 4 milliard dollarga sotishga erishdi. Lekin UFCning yangi xo'jayini ham Danani prezidentlik lavozimidan chetlatishni istamadi.

SHaxsiy hayoti

Dana shaxsiy hayotini iloji boricha oshkor qilmaslikka intiladi. U 1996 yili maktabdagi qiz o'rtog'i Ennaga uylangan. Ularning bir qiz va o'g'il farzandlari borligi malum. O'g'li Eydan Uayt otasining xuddi yoshlikdagi ko'rinishi desak adashmaymiz. Kichik Dana 2018 yili professional boksda debyut jangini o'tkazgan.

Xorij saytlaridagi xabarlar asosida Nig'monxo'ja Nozimov tayyorladi