Qozog'istonlik sportchilarga beriladigan mukofot pullari elon qilindi

24.kz xabariga ko'ra, Olimpiada chempioni bo'lgan sportchi 250 ming dollar mukofot puliga ega bo'ladi. Bu hali hammasi emas. Oltin medal sohiblariga pul mukofotiga qo'shimcha tarzda 3 xonali kvartira ham sovg'a qilinadi.

Bu malumotni davlat telekanaliga bergan intervyusida Qozog'iston sport va jismoniy tarbiya qo'mitasi raisining birinchi o'rinbosari Serik Jarasbaev oshkor qildi. Olimpiadaning kumush medal sohiblariga 150 ming dollar hamda 2 xonali kvartira vada qilindi. Bronza medal sovrindorlari esa 75 ming dollar va bir xonali kvartiraga ega bo'lishadi.

Malumot uchun, 2012 yili Londonda bo'lib o'tgan Yozgi olimpiya o'yinlarida ham xuddi shu tartibda pul mukofotlari taqdim etilgandi. Bu summa Markaziy Osiyo davlatlari orasida eng ko'pi hisoblanadi. Taqqoslash uchun, O'zbekiston sport delegaciyasi tarkibida chempion bo'lgan sportchilarimiz 200 ming dollar mukofot puliga ega bo'lishadi.

Rio-de-Janeyroda o'tkaziladigan Olimpiadada Qozog'iston sport delegaciyasi tarkibida 104 nafar sportchi 26ta sport turida medallar uchun bahslarga kirishadi. 5-21 avgust kunlari oralig'ida o'tkaziladigan olimpiya o'yinlari dasturidan 28ta sport turi o'rin olgan bo'lib, sportchilar 306ta medallar jamlanmasi uchun bahslarga kirishishadi.