Qutlug' 60 yoshingiz muborak, Anatoliy Kasimovich!

Anatoliy Kasimovich bugun qutlug' 60 yoshini qarshi oldi. Tajribali mutaxassis so'nggi yillarda ayollar kurashi jamoamizning xalqaro musobaqalarda erishayotgan yutuqlariga o'z xissasini qo'shib kelmoqda. Murabbiy terma jamoaning har bir azosida o'ziga, bellashuvlarda g'alabaga bo'lgan ishonchini uyg'ota oldi.    

Yaqinda 1 oktyabr – O'qituvchi va murabbiylar kuni munosabati bilan mamlakatimizda talim tizimini xalqaro standartlar asosida rivojlantirish, sohaga doir islohotlarni muvaffaqiyatli amalga oshirish, o'quv-tarbiya jarayoniga ilg'or xorijiy tajribalar, innovacion pedagogik va axborot-kommunikaciya texnologiyalarini keng joriy etish ishlariga qo'shgan munosib hissasi, o'quvchilarga ilm-fan asoslari va zamonaviy kasb-hunarlarni o'rgatish, ularning intellektual salohiyatini yuksaltirishdagi katta xizmatlari, yuqori malakali kadrlarni tayyorlash, har tomonlama sog'lom va barkamol avlodni voyaga etkazish, yoshlarni ona Vatanga muhabbat, istiqlol g'oyalariga sadoqat ruhida tarbiyalash yo'lidagi ibratli faoliyati hamda ijtimoiy hayotdagi faol ishtiroki uchun bir guruh yurtdoshlarimiz hukumatimiz tomonidan faxriy unvon, orden va medallar bilan mukofotlangan edi.

Quvonarlisi, ular safida tajribali murabbiyimiz Anatoliy Ibragimov ham bor edi. Sport yakkakurashlari bo'yicha Respublika oliy sport mahorati maktabining erkin kurash bo'yicha murabbiyi Anatoliy Kasimovich Prezident farmoniga binoan "Do'stlik" ordeni bilan mukofotlangandi.

Fursatdan foydalanib, O'zbekiston Sport kurashlari associaciyasi rahbariyati, murabbiylar va kurashchilar nomidan bugun qutlug' 60 yoshini nishonlayotgan Anatoliy Kasimovichni muborakbod etamiz. U kishiga uzoq umr, sihat-salomatlik, oilaviy baxt tilaymiz.