Rafael Fiziev jang sanasi va raqibini elon qildi

Fizievning aytishicha, uning jangi mart oyida bo'lib o'tadi va u divizionning sobiq vaqtinchalik chempioni, ayni paytda reytingning uchinchi pog'onasida borayogan Jastin Getjiga qarshi oktagonga ko'tariladi. 

"Ataman"ning amerikalikka qarshi jangi 4 mart kuni Las-Vegasda o'tkaziladigan UFC 285 yoki 18 mart sanasida London shahri mezbonlik qiladigan UFC 286 turnirida bo'lib o'tadi. 

"Menga UFC tashkilotidan qo'ng'iroq qilib, mart oyida Jastin Getjiga qarshi jang o'tkazasan, tayyorgarligingni boshla deb aytishdi. Bu jang Dana Uaytga ham qiziq. Tez kunda shartnomaga imzo chekaman. Vegas yoki London", - deya Captain Hardcore kanaliga intervyu bergan Fiziev. 

Eslatib o'tamiz, o'tgan yilning iyul oyida Rafael braziliyalik adashi Rafael Dos Anosni beshinchi raundda nokautga uchratib, UFC oktagonidagi g'alabasini seriyasini oltitaga etkazib olgandi. Jastin Getji esa may oyida o'sha paytdagi UFC chempioni CHarlz Oliveyraga imkoniyatni boy bergan edi. Braziliyalik jangchi birinchi raundning o'zida Jastinni bo'g'ib qo'ygandi.