Rasman. UFC Londonga qaytmoqda + POSTER

Bu haqda rasman liga rahbarlari xabar berishdi. Unga ko'ra, 2023 yilning 18 mart kuni Londondagi The O2 arenada UFC 286 turniri bo'lib o'tadi. Katta ehtimol bilan oqshomning markaziy jangi asli kelib chiqishi yamaykalik, hozirda Britaniya sharafini himoya qilayotgan Leon Edvards hamda nigeriyalik Kamaru Usman o'rtasida o'tkaziladi. 

Ushbu trilogiya jangiga qiziqish juda yuqori. SHu yilning 20 avgust kuni Solt-Leyk-Sitida o'tgan UFC 278 turnirida Leon Edvards dunyoni shok holatiga tushirib qo'ygandi. Ochkolar hisobiga ko'ra raqibiga yutqazayotgan Leon jang yakunlanishiga 56 soniya qolganda oyoq bilan kuchli va aniq zarba yo'llab, Kamaru Usmanni nokautga uchratgan hamda UFC chempioniga aylangan edi. Bu bilan Edvards 7 yil avvalgi mag'lubiyat uchun Usmandan revansh ham olgandi. 

Malumot uchun, The O2 arena 2022 yil hisobida ikkita UFC turnirini qabul qildi. Mart oyida UFC Fight Night 204, iyulda esa UFC Fight Night 208 turnirlari britaniyalik muxlislar tomonidan katta qiziqish bilan qarshi olindi. 

Britaniyadagi so'nggi raqamlangan UFC turniri esa 2016 yilning oktyabr oyida o'tkazilgan edi. Manchester shahrida o'tgan UFC 204 turnirida britaniyalik Maykl Bisping o'rta vazndagi chempionlik kamarini Den Xendersondan muvaffaqiyatli himoya qilgandi. Londonning o'zidagi so'nggi raqamlangan UFC turniri esa 2010 yilning oktyabriga to'g'ri keladi. O'shanda ham Bisping UFC 120 turnirining markaziy jangida yaponiyalik Yoshixiro Akiyamadan ustun kelgan edi.