Ravshan Ro'ziqulov: "Qo'shma yig'in har ikki tomon uchun ham foydali bo'ldi"

Xabar berganimizdek, Ravshan Ro'ziqulov murabbiyligidagi "klassiklar"imiz ikki hafta davomida Qirg'iziston terma jamoasi bilan birgalikda aynan "Yangiobod"da tashkil etilgan qo'shma mashg'ulotda ishtirok etishayotgandi. Kecha ushbu qo'shma yig'in yakuniga etdi. Biz terma jamoa bosh murabbiyi Ravshan Ro'ziqulovning xalqaro mashg'ulot yakunlari bo'yicha fikrlari bilan qiziqdik. 

"O'zbekiston va Qirg'iziston yunon-rum kurashi terma jamoalarining ikki haftalik qo'shma mashg'uloti har ikki tomon uchun ham foydali bo'ldi. Qo'shnilarimiz Toshkentga kuchli tarkib bilan kelishgandi. Kecha Toshkentga jo'nab ketishlari oldidan suhbatlashdik. Mashg'ulotlardan ko'ngillari to'lgani va xursand kayfiyatda Bishkekka qaytayotganlarini aytishdi. Eng muhimi, qo'shma mashg'ulotimiz jarohatlarsiz o'tdi. Yig'in ikkala jamoa uchun ham Qozog'istonda o'tadigan Tokio Olimpiadasining Osiyo licenzion turniriga tayyorgarlik vazifasini o'tab berdi. Hozir 3 ta yo'llanmamiz bor va qolgan shuncha licenziyani Almatidagi turnirda qo'lga kiritishga harakat qilamiz. Qozog'istonga boradigan tarkibni aniqlab olganmiz. Ulardan umidimiz katta. O'zlari ham masuliyatni his qilib turishibdi. Endigi rejalarga to'xtaladigan bo'lsam, "Yangiobod"dagi mashg'ulotlar 27 martgacha davom etadi va keyin Toshkent qaytib, tayyorgarlikning so'nggi bosqichini "Dinamo"da o'tkazamiz", - dedi R.Ro'ziqulov. 

Malumot uchun, 2019 yil Qozog'istonning Nur-Sultan shahri mezbonlik qilgan jahon chempionatida yunon-rum kurashchilarimizdan Elmurat Tasmuradov, Jalgasbay Berdimuratov va Rustam Assakalov Tokio Olimpiadasi yo'llanmasini qo'lga kiritishgandi.