Rayan Garsiya navbatdagi jangini qachon o'tkazishini aytdi, Dana Uayt ham bunga tayyor!

"Buni tan olish kerak, to'g'rimi? Buni hurmat qilish kerak. Men o'z darajamni imkon qadar yuqori ushlab turaman. Eng yaxshi chempion va boksning munosib yuzi bo'lish uchun qo'limdan kelganini qilaman", — dedi Garsiya.

Amerikalik 28 yoshli bokschi omma orasida katta shuhrat qozondi va shu bois o'z raqiblarini o'zi tanlash imkoniyatiga ega. Garsiya Benn bilan jangni Meksika Mustaqillik kuni arafasida o'tkazgan edi, endi esa u yana bir yirik meksikaliklar bayrami — "5 may" (Sinko de Mayo) arafasida ringga chiqmoqchi.

"Men bilan jang qilish — bu shubhasiz omadli chipta. Agar ular buni qo'lga kiritmoqchi bo'lishsa, bu omadli chipta kimga nasib etishini biz hal qilamiz. O'ylaymanki, tomoshabinlar buni Meksika Mustaqillik kunida tatib ko'rishdi, endi esa "Sinko de Mayo"da asosiy taomni olishadi. Keyingi safar hammasi yanada shafqatsizroq bo'ladi", — deb bayonot berdi Garsiya.

U asosiy raqib sifatida WBA chempioni Teofimo Lopesni tilga oldi va uni 7-8-raundlarda nokaut qilishga vada berdi. WBO chempioni Devin Xeyni haqida esa, ular kelajakda yarim o'rta vazn toifasida mutlaq jahon chempioni unvoni uchun uchrashishlari mumkinligini aytdi.

Garsiya va Benn o'rtasidagi jang Dana Uayt va uning "Zuffa Boxing" kompaniyasi tomonidan tashkil etilgan katta boks oqshomida bo'lib o'tdi. Uayt Garsiyaning navbatdagi jangini tashkil etishga tayyorligini bildirdi.

"U yana jang qilishga tayyor bo'lganida, bizga qo'ng'iroq qiladi va biz biror narsani o'ylab topamiz. Rayan Garsiya haqiqatan ham shunchalik kuchli va bugun u buni isbotladi", — dedi Uayt.

"Zuffa Boxing" avvalroq Benn bilan juda katta summa evaziga uzoq muddatli shartnoma imzolagan edi. Garsiyaning promouteri Oskar De La Xoyya shouda ishtirok etmadi, Dana Uayt esa uning kelishiga taqiq qo'yilgani haqidagi mish-mishlarni rad etdi.