Rio-2016. Engil atletika bahslarida AQSHdan 127 nafar sportchi qatnashadi

Braziliyaga yo'l oladigan tarkibdan 127 nafar engil atletikachi o'rin egallagan bo'lib, ulardan besh nafari amaldagi Olimpiya chempionlari, yana besh nafar esa jahon chempionlari hisoblanadi. Bundan tashqari 46 nafar sportchi turli darajadagi nufuzli xalqaro turnirlarda sovrinli o'rinlarni egallagan bo'lsalar, 84 nafar sportchi birinchi marta Olimpiya o'yinlarida qatnashadi. 

Bo'lajak Olimpiya o'yinlarining o'nkurash bahsida Eshton Iton, uzunlikka sakrash sektorida Brittni Riz, langarcho'pga tayanib sakrashda Jennifer Sur, uch xatlab sakrash musobaqasida Kristian Teylor va yugurish bahslarida Ellison Feliks chempionlik unvonlarini himoya qiladilar. 

AQSH engil atletikachilari orasida eng yoshi katta sportchi Bernart Lagat hisoblanadi. “Rio-2016” o'yinlari 41 yoshli sportchi uchun faoliyatidagi beshinchi Olimpiada bo'lib, u 5 km. masofaga yugurish bahslarida sovrinli o'rinlar uchun kurash olib boradi. O'z navbatida, 400 metr masofaga to'siqlar osha yugurish sektorida qatnashadigan Sidney Maklaflin amerikalik engil atletikachilar orasida eng yoshi hisoblanadi. Maklaflin 7 avgust kuni 17 yoshga to'ladi.

Eslatib o'tamiz, 2012 yili London (Buyuk Britaniya)da bo'lib o'tgan XXX yozgi Olimpiya o'yinlarida amerikalik engil atletikachilar 9 ta oltin, 12 ta kumush va 7 ta bronza medaliga sazovor bo'lishgan.

Malumot uchun, Rio-de-Janeyro shahrida o'tkaziladigan XXXI yozgi Olimpiya o'yinlarida engil atletika bo'yicha musobaqalar 12-21 avgust kunlari o'tkaziladi.