Rossiya JCH-2020 mezbonligiga davogarlik qilmaydi

Bu haqida Rossiya sport kurashlari federaciyasi prezidenti Mixail Mamiashvili xabar berdi.

"Biz reja asosida ishlayapmiz, - dedi Mamiashvili. - Malumki, 2022 yilgi kattalar o'rtasidagi Jahon chempionati Krasnoyarskda bo'lib o'tadi. 2021 yil esa Ufa o'smirlar o'rtasidagi jahon chempionatiga mezbonlik qiladi. Kuni kecha Birlashgan kurash dunyosi (UWW) 2020 yilgi mavsumning qolgan qismi uchun taqvim loyihasini taqdim etdi. Unga ko'ra mavsum restarti sentyabr oyiga mo'ljallanmoqda. Kattalar o'rtasidagi jahon chempionatini yil so'nggida o'tkazish rejalashtirilyapti. Bunga AQSH va Eron vakillari qarshi bo'lishdi. 

O'zi aslida bu yilgi taqvimda jahon chempionati yo'q edi. Tokio Olimpiadasining bir yilga kechiktirilishi sabab jahon chempionatini o'tkazish masalasi kun tartibiga chiqdi. UWW musobaqani qabul qilish istagida bo'lgan davlatlardan arizalar taqdim etilishini kutyapti. Birinchi bo'lib bu taklifni Belarus taqdim etdi. O'tgan yili bu mamlakatda Evropa o'yinlarining o'tkazilganini inobatga olsak, u erda jaxon chempionatini yuqori saviyada tashkil etsa bo'ladi. Minskda hamma narsa tayyor. Lekin keyinroq tashkilotchi tomon katta sarf-harajatlar qilishi malum bo'lgach, Belarus tomoni o'z arizasini qaytarib oldi. 

Avgust oyida UWW bu masalaga yana qaytadi va 2020 yilning dekabr oyida jahon chempionatini o'tkazish masalasini muhokamaga qo'yadi. Albatta, bunda koronavirus sabab dunyoda yuzaga kelgan epidemiologik vaziyat ham inobatga olinadi".