Safina Sadullaeva hozirgi jismoniy holati va oldinda kutib turgan musobaqalar haqida gapirdi

U tez orada bo'lib o'tadigan yopiq inshootlardagi Jahon chempionatida ishtirok etishni rejalashtirmoqda. MOQ matbuot xizmati sportchi bilan kichik suhbatni elon qildi.

— Qishki mavsum Siz uchun qanday o'tmoqda?

"Qisqa dam olishdan keyin xalqaro o'quv-mashg'ulot yig'inlariga yo'l oldim. Mashg'ulotlarimni 19 fevralgacha Estoniyada olib boraman. Bu orada Evropaning qator mamlakatlarida tashkil etiladigan xalqaro musobaqalarda ham ishtirok etishni reja qilganman".

— 2025 yil uchun o'z oldingizga qanday maqsad qo'ygansiz? 

"Avvalo, yozda o'tadigan Jahon chempionatida munosib ishtirok etish. Buning uchun musobaqa normativini (1.97 metr) bajarishim kerak. SHuningdek, yopiq inshootlardagi qita va dunyo birinchiliklari ham etiborim markazidagi asosiy musobaqalardan hisoblanadi".

— Siz qatnashadigan eng yaqin musobaqa qaysi?

"29 yanvar kuni Germaniyada xalqaro turnir bo'lib o'tadi. Dastlab shu musobaqada qatnashaman. Undan so'ng yana Estoniyada tayyorgarlikni davom ettiramam. Keyin holatimga qarab yana bir qancha startlarda o'z omadimni sinab ko'raman", dedi Safina Sadullaeva.