Saidyoqub Qahramonov va Firdavs Hasanov jang qilishi kerak bo'lgan XMMA turniri noodatiy sabab tufayli qoldirildi

8 aprel tongida Amerika Qo'shma SHtatlarining Janubiy Karolina shtatida aralash jang sanatlari bo'yicha XMMA 6 turniri o'tkazilishi lozim edi. Biroq, promoushenning facebook sahifasi orqali malum qilinishicha, mazkur sanada turnir o'tkaziladigan arenada xavfsizlik xodimlari etishmovchiligi yuz berishi mumkinligi tufayli turnir qoldirilgan. Endilikda turnir 3 may kuni bo'lib o'tishi aytilmoqda.

Etiborlisi, mazkur oqshomda o'zbekistonlik sobiq UFC jangchisi Saidyoqub Qahramonov amerikalik Fransisko Riveyraga qarshi jang qilishi kerak edi. Yana bir hamyurtimiz — Firdavs Hasanov esa Josh Smitga qarshi oktagonga chiqishi kutilayotgan edi.

Turnir doirasida jang qilishi kerak bo'lgan amerikalik UFC sobiq jangchisi Luis Penyaning Instagram'da yozishicha, tashkilotchilar musobaqaning bekor qilingani haqida jangchilarga hech narsa aytmagan va qo'ng'iroqlarga javob bermagan.

Saidyoqub Qahramonov ham ushbu vaziyatga munosabat bildirar ekan, tashkilotchilardan g'azabda ekanini yashirmadi.