Salomat Ko'chimova: "Maqsad bitta - Olimpiada yo'llanmasi!"

Har safar yo'llanmaga bir qadam qolganida ana shu imkoniyatni qo'ldan chiqarganmiz. Bu galgi to'rt yillikning eng nufuzli musobaqasidan murabbiylarimizning umidlari katta. Biz ayni mavzu yuzasidan terma jamoa murabbiylaridan biri Salomat Ko'chimova bilan suxbatlashdik. 

- Karantin davri hammamiz uchun sinov hisoblanadi. Siz va shogirdlaringiz bu kunlarni qanday o'tkazyapsizlar?

- Biz bu sinovni sabr qilib, karantin qoidalariga amal qilgan holda, mashg'ulotlardan cheklanmasdan, uy sharoitida o'tkazyapmiz. Karantin butun O'zbekistan xalqi uchun katta sinov. Xudo xohlasa, bu sinovlardan katta talofat va yo'qotishlarsiz o'tib olamiz. 

- SHogirdlaringizning mashg'ulotini onlayn tarzda kuzatib boryapsizmi?

- Albatta, har kunlik mashg'ulotlarni nazorat qilib boryapmiz. To'g'ri, to'laqonli mashg'ulot o'tkazishning sira ham iloji yo'q. Lekin bor imkoniyatdan foydalangan holda shug'ullanyapmiz. Oldimizga qo'ygan maqsadlarimiz ulkan. Nasib qilsa, ularga bosqichma-bosqich erishib boramiz. 

- SHogirdingiz SHohida Ahmedova 2018 yili Argentinada o'tgan o'smirlar Olimpiadasining kumush medali sovrindori hisoblanadi. Tabiiyki, kattalar terma jamoasining umidli azolaridan. Uning bugungi holati haqida nima deya olasiz?

- SHogirdim bilan karantin qoidalariga amal qilgan holda har kuni birga mashg'ulot o'tkazyapmiz. SHohidaning hozirki holati yaxshi. Yuqorida aytganimdek, jamoaviy sharoitda emasmiz. Lekin mashg'ulotni to'xtatganimiz yo'q. Bizni oldinda licenzion turnirlar kutib turibdi. Maqsad bitta - Olimpiada yo'llanmasi!

- Olimpiadaning bir yilga kechiktirilishi ayollar terma jamoasi azolari uchun foydali bo'ldimi yoki aksincha?

- Biz Olimpiada yo'llanmasini qo'lga kiritish uchun astoydil kirishgan edik. Qizlarimizning o'sha paytdagi tayyorgarligi, ko'zining yonib turishini inobatga olsak, Olimpiadaning qoldirilishi biz uchun yaxshi bo'lmadi. Boshqa tomondan esa tayyorgarlikning yanada kuchaytirib olish, raqiblarga qarshi munosib hozirlik ko'rish uchun fursat yuzaga keldi. Endi hozir butun dunyo bir xil holatda. 

- Qizlarimizning natijalari yildan-yilga ijobiy ko'rinish olyapti. Yoshlar o'rtasidagi jahon va qita chempionatlari, o'smirlar Olimpiadasida g'olib hamda sovrindorlarimiz bor. Bu o'sishni nima bilan bog'liq deb o'ylaysiz? Selekciya natijasimi yoki boshqa omillari bormi?

- Bizning sport turida qizlarga bo'lgan etibor sezilarli darajada kuchaytirildi. Oldinlari bir-ikkita viloyatda sanoqli qizlar bor edi. Men buni o'zimdan qiyos qilaman. Kurashchi sifatida 16 yil musobaqalarda ishtirok etdim. U paytlarda kurash bilan shug'ullanadigan qizlar kam edi. Hozir esa deyarli barcha viloyat kurashchi-qizlari O'zbekiston chempionatlarida qatnashyapti. Buning natijasida kuchli raqobat yuzaga kelgan. Sportchilarni rag'batlpntirish, ularga bo'lgan etibor qizlarimizni ruhlantiryapti. Qolaversa, har bir o'quv-mashg'ulot yig'iniga sportchining murabbiy ham jalb etilyapti. Bosh murabbiyga har bir viloyatdan trenerlar ko'maklashyapti. Tabiiyki, bu yondashuv qizlarimizning o'sishiga katta xissa qo'shyapti. 

O'zbekiston sport kurashlari associaciyasi matbuot xizmati