Samarqandlik yoshlar mamlakat kubogi sohibi

Yakkakurash sport turlariga ixtisoslashtirilgan bolalar-o'smirlar sport maktabida o'tkazilayotgan musobaqa dasturiga ko'ra, dastlab yunon-rum kurashi bo'yicha bellashuvlar o'tkazildi. 

Qoraqalpog'iston Respublikasi, Toshkent shahri va barcha viloyatlar vakillari ishtirok etgan musobaqada polvonlar o'nta vazn toifasida gilam chiqishdi. -38, -41, -44, -48, -52, -57, -62, -68, -75, -85 kilogramm vazn toifalarida o'tkazilgan bellashuvlar finalida mezbonlar - Samarqand viloyati jamoasi buxorolik yosh polvonlarga qarshi gilamga chiqishdi. 

Murosasiz kechgan bahsda samarqandlik yoshlar raqiblarini 7:3 hisobida mag'lub etib, “O'zbekiston kubogi” sohibi bo'lishdi. Uchinchi o'rin uchun kechgan kurashda Toshkent viloyati jamoasi farg'onalik polvonlarni shunday hisobda mag'lub etishdi.

Musobaqa g'olib va sovrindorlari tashkilotchilar tomonidan diplom, medal va esdalik sovg'alari bilan taqdirlanishdi. Endi navbat erkin kurashchilarga.