SHahzodbek SHarobiddinov WBA Asia kamari sohibi!

FW1 promouterlik kompaniyasi tomonidan tashkil etilgan ushbu boks oqshomining markaziy jangida hamyurtimiz SHahzodbek SHarobiddinov (6-1) koreyalik Son Kvan Liga qarshi ringga ko'tarildi. O'n raund to'liq davom etgan jangda charm qo'lqop ustamiz hakamlarning yakdil qarori bilan ochkolar hisobiga ko'ra g'alaba qozonib, WBA Asia kamarini qo'lga kiritdi. 

Eslatib o'tamiz, bugungi turnirda "Favzul Munavvar" promouterlik klubining barcha 5 nafar bokschisi raqiblarini mag'lub etishni uddalashdi.

Hamyurtlarimizning ishtirokini Doniyorbek Hayitaliev chiroyli g'alaba bilan boshlab berdi. 67 kg vazn toifasidagi hamyurtimiz birinchi raundning o'zida asli o'zbekistonlik, hozirda Koreya Respublikasi sharafini himoya qilayotgan Abdulla Nig'matovni texnik nokautga uchratdi.

74 kg vazn toifasida kechgan 6 raundlik jangda hamyurtimiz Egamberdi Nuriddinov Koreya Respublikasi vakili Dae Xyun Baekni hakamlarning yakdil qarori bilan mag'lubiyatga uchratdi.

59 kg vazn toifasida ringga ko'tarilgan bokschimiz Sirojbek Ismoilov 6 raund to'liq davom etgan jangda koreyalik raqibi In Ho CHoyni ochkolar hisobiga ko'ra mag'lubiyatga uchratdi.

53.5 kg vazn toifasidagi bokschimiz Husniddin Maraimov 6 raund to'liq davom etgan jangda koreyalik In Su Jangni ochkolar hisobiga ko'ra taslim etdi.