SHanxay "Masters" bosh sovrini Polshaga ketdi

ATP reytnigida 17-pog'onada borayotgan polshalik tennischi hal qiluvchi final uchrashuvida dunyoning ettinchi raketkasi, rossiyalik Andrey Rublyovni 6/3, 3/6, 7/6(8) hisoblarida mag'lub etishni uddaladi. Tennischilarning o'zaro uchrashuvlaridagi hisob Xubert foydasiga o'zgardi - 3:2. 

Etiborlisi, Gurkach hal qiluvchi uchinchi setning tay-brekida avvaliga 2:5, keyin match-boll holatdagi 5:6 hisobidan chiqib ketishga muvaffaq bo'ldi. Ikki soatu 9 daqiqa davom etgan bahsda Rublyov 13, Gurkach 21 ta eys zarbani amalga oshirgan. Ikkala tennischi ham qo'shxatoga yo'l qo'ymadi. Breyklar soni ham bir xil bo'ldi - 1 tadan. 

Polshalik tennischi faoliyatida ikkinchi bor "Masters" turnirida chempion bo'ldi. U 2021 yilgi Mayami "Masters" turnirida ham bosh sovrinni qo'lga kiritgandi. Umumiy hisobda bu uning faoliyatidagi ettinchi ATP sovringa aylandi. 

SHanxaydagi bir haftalik mehnat Gurkachga 1000 reyting ochkosi hamda 1 million 262 ming 220 AQSH dollari mukofot puli keltirdi. Rublyov esa 600 ochko va 662,360 dollar ishlab oldi. Xubert bugun elon qilinadigan haftalik reytingda 11-o'ringa ko'tarilib oladi. Finaldagi mag'lubiyatga qaramay, Rublyov 5-o'ringa joylashadi. Bu uning faoliyatidagi eng yuqori reyting o'rni hisoblanadi.