SHarofiddin Lutfullaev: "Jahon chempionatiga ortiqcha tarif shart emas"

Dunyo birinchiligi uchun 5 ta qitaning 149 davlatidan jami 860 nafar (519 erkak, 341 ayol) dzyudochi ro'yxatdan o'tgan. Ular qatorida 11 nafar o'zbekistonlik dzyudochi ham jahon chempionati medallari hamda Tokio-2020 Olimpiadasining qimmatli reyting ochkolari uchun tatamiga chiqadi. 

Avval xabar berganimizdek, bugun terma jamoamiz sportchilari Yaponiyaning Maydzuru shahrida tashkil etilgan bir haftalik o'quv-mashg'ulot yig'inini yakunlashdi. 

- Mashg'ulotimiz reja asosida, ko'tarinki kayfiyatda o'tdi, - deydi biz bilan suhbatda terma jamoamizning etakchi vakili SHarofiddin Lutfullaev. - Menimcha, jahon chempionatiga ortiqcha tarif berish shart bo'lmasa kerak. Fikrimni musobaqaga kelayotgan ishtirokchi davlatlar soni ham tasdiqlaydi. Har bir vaznda kurash keskin kechadi. Bunga shubha yo'q. Bizning -60 kg vazn ham bundan mustasno emas. Juda kuchli raqiblar jam bo'lgan. Tabiiyki, tayyorgarligimiz ham shunga yarasha bo'ldi.

SHarofiddin Lutfullaev aytganidek, har bir vaznda kuchli raqobat bo'ladi. -66 va -73 kg vazn toifalarida 92 nafardan dzyudochi ro'yxatdan o'tgan. SHarofiddinning vaznida esa 75 sportchi jahon chempionati medallari uchun kurashadi. Lutfullaev ettinchi raqam ostida saralangan. Rossiyalik Robert Mshvidobadze vazn peshqadami. Undan keyingi o'rinlarni yaponiyalik Naoxisa Takato, gruziyalik Amiran Papinashvili, yana bir Kunchiqar yurt vakili Ryuju Nagayama, qozog'istonlik Eldos Smetov hamda mo'g'ulistonlik Amartuvshin Dashdavaa band etgan. 

Umid qilamizki, o'zbekistonlik dzyudochilar orasida eng yuqori reyting o'rniga ega bo'lib turgan SHarofiddin Lutfullaev jahon chempionatida o'zining nimalarga qodir ekanligini ko'rsatadi. Ko'z tegmasin, uning hozirgi sport formasi shoxsupaga ko'tarilishi uchun zamin hozirlaydi.