SHodiev va Islomov Jahon chempionatining bronza medali uchun kurashadi

Jahon chempionatining 92 kg vazn toifasidagi bahslarida yurtimiz sharafini himoya qilayotgan Rustam SHodiev 1/8 finalda italiyalik Davide Kossuni 10-0 hisobida mag'lub etgan, ammo chorak finalda rossiyalik Azamat Zakuevga imkoniyatni boy berib qo'ygandi. 

Zakuev finalga yo'l olgani bois, SHodievda bronza medali uchun kurashish imkoniyati yuzaga keldi. Buning uchun u avvaliga o'tish bahsida makedoniyalik Stol Eftimovni mag'lub etishi shart. Keyin esa bronza medali uchun kechaligan uchrashuvda yarim finalda mag'lubiyatga uchragan turkiyalik Erxan Yaylachiga qarshi gilamga chiqadi.   

86 kg vazn toifasidagi erkin kurashchimiz Bobur Islomovda ham jahon chempionatining bronza medalini qo'lga kiritish imkoniyati yuzaga keldi. Uni 1/8 finalda mag'lub etgan ukrainalik Muhammad Aliev finalga etib bordi. Endi Islomov o'tish bellashuvida germaniyalik Lars SHayflega qarshi gilamga chiqadi. G'alaba qozongan taqdirda uni bronza medali uchun bo'lib o'tadigan uchrashuvda rossiyalik Zagid Karimov qarshi oladi. 

CHorak finalga etib kelgan 74 kg vazn toifasidagi erkin kurashchimiz Asomiddin Hasanov Xrayar Alixanyanga 0-10 hisobida imkoniyatni boy bergandi. Lekin arman kurashchisining o'zi ham yarim finalda mag'lubiyat alamini totib ko'rdi va bu bilan Hasanovga bronza uchun kurashish eshiklarini yopdi.