Sobir Rahimov: "Karantinni mazmunli o'tkazishga harakat qilyapmiz"

Avval xabar berganimizdek, O'zbekiston sport kurashlari associaciyasi mutasaddilari, murabbiylar, xodimlar o'z vazifalarini masofadan olib borishyapti. 

Xususan, Associaciyamizning Buxoro viloyati bo'limida ham ishlar reja asosida olib borilyapti. Suhbatdoshimiz erkin kurash bo'yicha viloyat terma jamoasi murabbiyi Sobir Rahimovdan ayni mavzu bo'yicha qisqacha intervyu oldik. 

- Sobir aka, bugungi sinovli kunlarni qanday o'tkazyapsizlar? 

- O'zbekiston sport kurashlari associaciyasidan viloyatlardagi bo'limlarga rejaviy dastur taqdim etilgan. Ishlarni shu asosida olib boryapmiz. Endi bu elga kelgan to'y. Nasib qilsa, tez kunlarda bu balodan qutulamiz. 

- Viloyatdan terma jamoalarga nomzod kurashchilar bilan bog'lanib turibsizlarmi?

- Albatta. Har kuni onlayn tarzda video mashg'ulot o'tkazamiz. Terma jamoaga nomzod kurashchilarimizning bosh murabbiy tomonidan berilgan alohida dasturlari ham bor. SHu asosda mashg'ulot o'tkazishyapti. To'g'ri, karantin davrida to'laqonli mashg'ulot o'tkazishning imkoni yo'q. Lekin bor imkoniyatdan maksimal darajada foydalanyapmiz.         

- Sobir aka, ochig'i ish bilan bo'lib farzandlarimiz bilan ham kamroq suhbatlashardik. Karantin kunlari esa har kuni oilamiz davrasidamiz...

- Ha, nimasini aytasiz. Musobaqalar, o'quv-mashg'ulot yig'inlari sabab uyda kam vaqt bo'lardik. Hozir farzandlar bilan birga dars tayyorlayapmiz. Hovlimizda kichik issiqxonamiz bor. U erda jismoniy mehnat bilan shug'ullanyapmiz. Zerikishga hojat yo'q.  

Malumot uchun, Sobir akaning shogirdlari orasidan Mirzo Hayitov, Feruz Yoqubov, Sohib Iskanderov singari kurashchilarni alohida takidlab o'tish o'rinli bo'ladi.