"Sog'lom hayot uchun 5 ming qadam" – marafon Namanganda davom etmoqda

O'zbekiston Respublikasi Jismoniy tarbiya va sport vazirining 2020 yil 1 iyundagi «O'zbekiston Respublikasiga koronavirusning kirib kelishi va tarqalishini oldini olish yuzasidan chora-tadbirlar dasturini tayyorlash bo'yicha respublika maxsus komissiyasi qaroriga ko'ra hududlarda sport mashg'ulotlarini tashkil etish to'g'risida»gi 645-sonli buyrug'iga binoan, mamlakatimizning «yashil» hududlarida sport sekciyalari, to'garaklari, sport zallari va fitnes-klublar faoliyati yo'lga qo'yilmoqda.

Qolaversa, sportchilar ham karantin talablariga rioya qilgan holda mashg'ulotlarni olib borishi bo'yicha ham chora-tadbirlar ishlab chiqilmoqda. SHuningdek, 8 iyun kuni Jismoniy tarbiya va sport vaziri Dilmurod Nabiev rahbarligida o'tkazilgan videoselektor yig'ilishida karantin talablari bosqichma-bosqich yumshatib borilayotgani sababli endilikda aholining bo'sh vaqtlarini mazmunli tashkil etish va salomatliklarini tiklashda ustuvor bo'lgan sport mashg'ulotlari jarayoniga ularni ko'proq jalb etish masalasiga alohida etibor qaratilgan edi.

Kuni kecha Namangan viloyati jismoniy tarbiya va sport boshqarmasi, CHortoq tuman jismoniy tarbiya va sport bo'limi tashabbusi bilan nuroniylar ishtirokida «Salomatlik uchun 5 ming qadam», «Sog'lom hayot uchun 5 ming qadam» shiorlari ostida piyoda yurish marafoni o'tkazildi.

Mazkur marafon CHortoq tuman bolalar-o'smirlar sport maktabi markaziy o'yingohida tashkil etilib, barcha marafon ishtirokchilari karantin qoidalariga to'liq rioya qilgan holda tashkil etildi. bu kabi harakatlar inson salomatligi uchun bo'lgan ahamiyati yuzasidan aholiga keng manoda tushuntirishlar ham berildi.