Sport kurashlari. Ikki vakilimiz oltin, yana ikkisi bronza uchun kurashadi

Ushbu musobaqa erkin, yunon-rim va ayollar kurashi vakillari uchun joriy 2020 yil hisobidan o'rin olgan ilk reyting turniri hisoblanadi. Bugun yunon-rim kurashi ustalari medallar va reytirng ochkolari uchun bahslarni boshlab berishdi. 

Quvonarlisi, hamyurtlarimizning to'rt nafari ertaga medallar uchun kechadigan bellashuvlarda gilamga chiqish imkoniyatini qo'lga kiritishdi. -60 kg vazn toifasida yurtimiz sharafini himoya qilayotgan Islomjon Bahromov finalga yo'l oldi. U chorak finalda jamoadoshi Feruz To'xtaevni qiyinchilik bilan 8:7 hisobida engdi. Yarim finalda hindistonlik Sachin Ranaga hech qanday imkoniyat qoldirmadi - 9:0. Uning ertangi oltin medal uchun bellashuvdagi raqibi xitoylik Saylike Valixan bo'ladi. Feruz To'xtaev esa aynan Ranaga qarshi bronza medali uchun kurashadi.  

-67 kg vaznda gilamga chiqayotgan yurtdoshimiz Mahmud Baxshilloev ham final yo'llanmasiga ega bo'ldi. Mahmud chorak finada italiyalik Ruben Marvaysni 8:0, yarim finalda venesuelalik Xaver Palensiya Puentesni 8:0 hisobida taslim etdi. Endi u ertaga oltin medal uchun kechadigan uchrashuvda misrlik Muhammad El Sayid Abuhalimaga qarshi bahs olib boradi.       

Eng og'ir (-130 kg) vazndagi kurashchimiz Mo'minjon Abdullaev birinchi bosqichda italiyalik Luka Godinoni 8:0 hisobida engdi. Lekin 1/4 finalda misrlik Abdulatif Muhammad Ahmadga 4:6 hisobida yutqazib qo'ydi. O'tish bahsida finlyandiyalik Yoxannes Kostadan ustun kelgan Mo'minjon ertaga bronza medali uchun gilamga chiqadi. Uning raqibi norvegiyalik Oskar Marvik bo'ladi.  

O'zbekiston sport kurashlari associaciyasi matbuot xizmati