Sport kurashlari. O'smirlarimizdan Olimpiya o'yinlariga licenziya!

Bugun ayollar kurashi va erkin kurash bo'yicha bellashuvlar bo'lib o'tdi. Avvalroq ayollar kurashi bo'yicha ikki nafar sportchimiz SHohida Ahmedova va Svetlana Oqnazarovalar final yo'llanmasini hal qilib, o'smirlar Olimpiya o'yinlariga yo'llanma sohibasiga aylanganliklari haqida xabar qilgandik.

Biroz avval qizlarimiz musobaqaning final jangida kurashga chiqdilar. Afsuski, ularning har ikkisi ham hal qiluvchi bellashuvda imkoniyatni boy berib qo'ydilar va Osiyo chempionatining kumush medallari bilan kifoyalanishdi. Ammo, xabar berib o'tganimizdek, finalga chiqish orqali ular oktyabr oyida Buenos-Ayresda bo'lib o'tadigan o'smirlar Olimpiya o'yinlariga yo'llanmani naqd qilib qo'ygandilar.

Erkin kurashning -80kg vazn toifasida yurtimiz sharafini himoya qilgan Muhammadrasul Rahimovga finalda biroz omad etishmadi. Hamyurtimiz butun jang davomida ustunlik qildi. Afsuski, 4:0 hisobida oldinda borayotgan sportchimiz so'nggi soniyalarda tashabbusni raqibga boy berib qo'ydi va 4:5 hisobida mag'lubiyatga uchradi. SHu tariqa Muhammadrasul Osiyo chempionatining kumush medalini qo'lga kiritdi hamda Olimpiya o'yinlari licenziyasidan quruq qoldi.

-71kg vaznda musobaqada ishtirok etgan Azizbek Fayzullaev esa bronza medali uchun bahsda yaponiyalik raqibi ustidan g'alaba qozonib, musobaqa sovrindorlari qatoridan o'rin oldi.

Ertaga musobaqaning so'nggi kuni bo'lib o'tadi va unda erkin kurash bo'yicha bellashuvlar tashkil qilinadi.