Sport kurashlarida onlayn muloqot bo'lib o'tdi

Unda murabbiylar, sportchilar va hakamlar ishtirok etishdi. Erkin kurash bo'yicha O'zbekiston terma jamoasi maslahatchi-murabbiyi Ali Ahmedov kurashchilarning mashg'ulot olib borish jarayonlari haqida gapirib berdi. Turli iqlim va joy sharoitlariga mashg'ulotlardagi o'zgarishlarga alohida urg'u qaratdi. Mashg'ulotlarda ko'proq nimalarga etibor qaratish kerak ekanligini tushuntirdi. 

"Sport kurashlarida eng muhim jihat bu - kuch! Kuch esa jismoniy mashg'ulotlar yordamida bunga erishiladi. Ko'proq shtanga ko'tarish kerak. Lekin bu jarayonda og'irlikka etibor qaratish lozim. Dengiz sathidan balandlik ham mashg'ulotlarda inobatga olinishi kerak. Yani yuklamalar ko'r-ko'rona belgilanmasligi lozim. Moslashuvchanlikni rivojlantirish uchun biz malum bir akrobatik mashqlarni o'rganamiz: umbaloq oshish, koleso, rondat, turli ko'rinishdagi salto, oyoqlarni tepaga qaratgan holda qo'lda yurish, most holatidan tik holatga kelish. Egiluvchanlik sifati ixtiyoriy hisoblanadi. Kurashchi uchun unchalik ham zarur va majburiy emas. Aksariyat mashhur polvonlar egiluvchanlik emas, aksincha, moslashuvchanligi bilan ajralib turadi. Ular bu kamchilikni o'zlarining boshqa rivojlangan sifatlari, masalan kuch bilan berkitishga harakat qilishadi va bu ish beradi. Ayrim kurashchilar ayyorlik ham ishlatishadi. Bu shundan dalolat beradiki, kurash faqat kuch va moslashuvchanlikdan iborat emas. Bu xuddi shaxmat doskasiga o'xshaydi. Partiyada grossmeysterlardan qisqa fursatda aql bilan tez qaror qabul qilish qobiliyatiga ega bo'lish talab etiladi. Qiyin vaziyatdan chiqib ketish o'sha shaxmatchining qanday kuch va mahoratga ega ekanidan dalolat beradi. Har qanday holatda ham puxta ishlab chiqilgan moslashuvchanlik ham samara keltiradi. Kuch, epchillik, texnika, aql kabi sifatlar kurashchini g'alaba sari etaklaydi. Bu sifatlar kurashchining taktik imkoniyatlarini kengaytirishga ham imkon beradi", - dedi terma jamoamiz murabbiyi.  

Ushbu onlayn muloqotni O'zbekiston milliy olimpiya qo'mitasi prezidenti Rustam SHoabdurahmonov kuzatib bordi. Tadbirning ikkinchi qismida u murabbiy va sportchilar bilan alohida suhbatlashdi. Qoraqalpog'iston Respublikasi, barcha viloyat vakillari bilan hozirgi vaziyat, mavjud kamchiliklar xususida fikr almashdi. Rustam SHoabdurahmonov karantin qoidalariga to'liq rioya qilishga, pandemik vaziyatda hamma o'z salomatligiga etibor qaratib, extiyot bo'lishga chaqirdi.