Stipe Miochich Frensis Ngannuga murojaat qildi

U ikki yarim oy muqaddam farzandidan ayrilgan edi. 

"Bu shunchaki dahshatning o'zginasi. Unga bardam bo'lishini tilayman. Ochig'i, o'zimning ham ikki farzandim bo'lgani uchun bu mavzuda gapirishdan ham qo'rqaman. Ichidan qanday kechinmalar o'tkazayotganini bilib turibman. Men u uchun duo qilaman. Bir necha kun oldin murabbiyi Erik Niksik shogirdi sekin-asta o'ziga kelayotganini aytdi. Zalga qaytib, mashg'ulotlarni ham boshlabdi", - deya CBS Sports kanaliga intervyu bergan Miochich.  

"U o'ziga kelyapti. Sizga u haqda aytmoqchi bo'lgan eng yaxshi xabarim shu. Yuzida kulgu ko'ra boshladim, hazil qilyapti. Zalga qaytdi va SHon Striklend bilan birga mashg'ulot o'tkazyapti. Bu eng muhimi. Kuni kecha u menga keyingi jangini marhum o'g'li Kobening ruhiga bag'ishlashini aytdi", - dedi amerikalik murabbiy "CHas MMA" podkastida. 

Eslatib o'tamiz, Frensis Ngannu shu yilning mart oyida boks jangida sobiq jahon chempioni Entoni Joshuaga nokaut bilan yutqazib qo'ygandi. Stipe Miochich esa noyabr oyida oktagonga qaytishni rejalashtirmoqda. Uch yildan ko'proq vaqt davomida oktagondan tashqarida bo'lib turgan Miochich amaldagi UFC chempioni Jon Jons bilan jang qilish istagini bildirgan.