"Sukut saqlashni maqul ko'rgandim, lekin...". Pirlo Italiya FF bilan barbod bo'lgan kelishuv haqida gapirdi

Oldinroq OAVda 47 yoshli mutaxassis Italiya futbol federaciyasi (FIGC) bilan 2030 yilgacha mo'ljallangan shartnoma imzolashi haqida xabar berilgandi. Keyinchalik Pirloning Rossiya bukmekeri bilan shartnomasi tufayli bu tayinlov atrofida katta bahs-munozaralar alanga oldi.

“FIGC va barcha aloqador shaxslarga bo'lgan hurmatim yuzasidan sukut saqlashni maqul ko'rgandim, ammo kecha oqshom Italiya terma jamoasi bosh murabbiyligiga nomzodim boshqa ko'rib chiqilmayotganini bilgach, bazi jihatlarga oydinlik kiritishni o'z burchim deb hisoblayman.

So'nggi kunlarda ismim va milliy terma jamoa bosh murabbiyi lavozimini egallash imkoniyatim atrofida avj olgan muhokamalarni katta afsus bilan kuzatdim.

Butun faoliyatim davomida — avval futbolchi, bugun esa murabbiy sifatida har doim o'zim ishlagan mamlakatlar qonunlariga va imzolangan shartnomalarga po'latdek amal qilib kelganman. So'nggi bahslarga sabab bo'lgan hamkorlik BAAdagi professional faoliyatim doirasida yuzaga kelgan bo'lib, sof tijoriy va sport xususiyatiga ega. Unga siyosiy mazmun berish menga hech qachon bildirmagan qarashlarimni yopishtirish deganidir.

Menga ko'rsatgan hurmati va bildirgan ishonchi uchun Paolo Maldini [FIGC texnik direktori] va Leonardoga [Maldinining maslahatchisi] minnatdorlik bildirmoqchiman. Ularning professionalligi, o'z ishiga jiddiy yondashuvi va Italiya futboliga bo'lgan cheksiz mehrini bilaman. Sof sportga oid qaror bunchalik tez ommaviy muhokamaga aylanib, yakunda menga tegishli bo'lmagan fikrlarning yopishtirilgani juda achinarli”, – deb yozdi Pirlo ijtimoiy tarmoqlarda.

Eslatib o'tamiz, ilgari Pirlo Italiyaning “Sampdoriya” va Turkiyaning “Fotih Karagyumruk” jamoalarini boshqargan. 2025 yildan beri esa BAAning “Yunayted” klubiga murabbiylik qilib kelmoqda.