Superbet Chess Classic Romania. Nodirbek Abdusattorov ochko jamg'arishda davom etmoqda

Grand Chess Tour 2025 tasnifiga kiruvchi — Superbet Chess Classic Romania turnirining mukofot jamg'armasi 350 000 AQSH dollarini tashkil qiladi. G'olib umumiy summaning 100 000 dollariga ega bo'ladi. Dunyoning ko'zga ko'ringan grossmeysterlari qatorida bosh sovrin uchun Nodirbek Abdusattorov ham kurash olib bormoqda. 

Grossmeysterimiz kecha o'tkazilgan 8-tur uchrashuvida turnir jadvalida ikkinchi o'rinni egallab turgan franciyalik Alireza Firuzdjaga qarshi qora donalarda o'ynadi va durangga imzo chekdi. Nodirbek 7-turda musobaqadagi birinchi g'alabasini qo'lga kiritgandi. U oq donalarda polshalik xalqaro grossmeyster Yan-Krishtof Dudani mag'lubiyatga uchratgan edi. 

Nodirbek so'nggi 9-tur oldidan 1 g'alaba, 6 durang va 1 mag'lubiyat bilan 4 ochko jamg'argan holda qo'shimcha ko'rsatkichlarga ko'ra 7-pog'onadan 5-o'ringa ko'tarilib oldi. Amerikalik Uesli Sodan ustun kelgan hindistonlik Rameshbabu Praggnanandha 5 ochko bilan yakka peshqadamga aylanib oldi. Nihoyat, amaldagi jahon chempioni Gukesh Dommaradju ham musobaqadagi birinchi g'alabasini qo'lga kiritdi. U qora donalarda o'ynaganiga qaramay, amerikalik Levon Aronyanni taslim eta oldi.   

Bugun musobaqaning so'nggi 9-tur uchrashuvlari o'tkaziladi. Nodirbek Abdusattorov oq donalarda turnir jadvalida 3,5 ochko bilan qo'shimcha ko'rsatkichlarga ko'ra 8-o'rinni egallab turgan amerikalik grossmeyster Uesli Soga qarshi bahs olib boradi. Agar hamyurtimiz bugun g'alaba qozona olsa, katta ehtimol bilan musobaqani kuchli uchlikda yakunlaydi.