Suv polochilar poytaxtda, akademik eshkak eshuvchilar esa Toshkent dengizida jam bo'lishdi

Jumladan, ayni kunlarda suv polosi hamda akademik eshkak eshish bo'yicha milliy terma jamoalarimiz navbatdagi o'quv-mashg'ulot yig'inlariga kirishgan.

Jismoniy tarbiya va sport vazirining 2020 yil 2 oktyabrdagi 1125-sonli buyrug'iga muvofiq 6-29 oktyabr kunlari suv polosi bo'yicha 16 nafar sportchi hamda ikki nafar trener Toshkentdagi Suv sporti turlarini rivojlantirish markazida o'quv-mashg'ulot yig'inlarini tashkil etishgan. Mazkur o'quv-mashg'ulot yig'ini suv polosi bo'yicha O'zbekiston ayollar terma jamoasi uchun Italiyaning Triest shahrida bo'lib o'tadigan Olimpiya o'yinlariga yo'llanma beruvchi nufuzli Xalqaro turnirga puxta tayyorgarlik ko'rishiga xizmat qiladi.

24 nafar sportchi, 5 nafar trener hamda bir nafar shifokordan iborat akademik eshkak eshish bo'yicha O'zbekiston terma jamoasi Toshkent dengizida joylashgan Suv sporti turlari bo'yicha Respublika Oliy sport mahorati maktabi tassarufidagi sport bazasida o'quv-yig'in mashg'ulotlarini olib bormoqda.

Mazkur o'quv-mashg'ulotlar yig'ini mart oyida Tailandning Pattayya shahrida bo'lib o'tadigan Osiyo chempionatiga tayyorgarlik vazifasini o'tab berish barobarida o'smirlar va yoshlar orasidan iqtidorli sportchilarni milliy terma jamoa safiga saralab olishga xizmat qiladi.