Suv polosi. O'zbekiston ayollar terma jamoasi Jahon kubogi yo'llanmasiga ega chiqdi!

Mazkur turnirda O'zbekiston erkaklar va ayollar terma jamoalari ham ishtirok etishdi.

Quvonarlisi, O'zbekiston ayollar terma jamoasi musobaqa yakunida bronza medalini qo'lga kiritish bilan birga, shu yilning 1-7 may kunlari Germaniyaning Berlin shahrida o'tkaziladigan Jahon kubogining ikkinchi divizioni musobaqasiga yo'llanmani ham qo'lga kiritdi.

Malumot o'rnida, O'zbekiston ayollar terma jamoasi bunday turdagi nufuzli musobaqaga ilk marotaba yo'llanmani qo'lga kiritmoqda.

Vakilalarimiz turnirda Tailand terma jamoasini 16:13, Singapurni esa 11:10 hisobida mag'lubiyatga uchratib, bronza medaliga ega chiqishdi.

Ayollar o'rtasidagi musobaqa yakunlariga ko'ra, Qozog'iston vakillari birinchi, tailandliklar ikkinchi, O'zbekiston terma jamoasi esa uchinchi o'rinni band etdi.

Erkaklar o'rtasidagi bahslarda O'zbekiston, Xitoy, Singapur, Eron, Tailand, Gonkong, Qozog'iston, Filippin kabi jami 8 ta terma jamoa ikki guruhga bo'lingan holda ishtirok etdi. O'zbekiston terma jamoasi “A” guruhidan o'rin egalladi.

Terma jamoamiz guruh bosqichi o'yinlari yakuniga ko'ra 5-8 o'rinlar uchun kurashni davom ettiradigan bo'ldi. Pley-off bosqichining dastlabki uchrashuvida Gonkong terma jamoasini 12:11 hisobida mag'lubiyatga uchratgan vaterpolchilarimiz, 5-6 o'rinlar uchun Singapur termasi bilan bahs yuritadigan bo'lishdi.

Mazkur uchrashuv kutilganidek so'nggi daqiqalarga qadar murosasiz kurashlar ostida kechdi va unda musobaqa mezbonlari bir to'p farqi bilan 12:11 hisobida g'alaba qozondilar.

SHunday qilib, erkaklar o'rtasida bo'lib o'tgan musobaqada O'zbekiston terma jamoasi kuchli oltilikdan o'rin egalladi. Mazkur musobaqada Xitoy termasi oltin, Eron vakillari kumush, qozog'istonlik vaterpolchilar esa bronza medaliga sazovor bo'lishdi.