Suvga sakrash. Hamyurtlarimiz Evro Osiyo kubogida sovrindor bo'lishdi

4-6 mart kunlari Rossiyaning Saransk shahrida o'tkazilgan mazkur nufuzli musobaqada Vatanimiz sharafini to'rt nafar hamyurtimiz – bular Botir Hasanov, Marsel Zaynetdinov, Xojiakbar Fuzaylov va Egor Mishenev himoya qilishdi. Uch kun davomida o'tkazilgan musobaqalarda Botir Hasanov va Marsel Zaynetdinov dueti 10 metr balandlikdagi tramplindan sakrashda kumush medal sovrindori bo'lishdi.

Terma jamoamizning etakchi sportchilaridan biri Marsel Zaynetdinov o'n metr balandlikdagi tramplindan sakrash bo'yicha yakkalik bahslarida ham ishtirok etib, bronza medali sohibi bo'ldi. Uch metr balandlikdagi tramplindan sinxron sakrash bo'yicha o'tkazilgan musobaqada bahslarga kirishgan Xojiakbar Fuzaylov hamda Egor Mishenov juftligi yakunda uchinchi o'rinni band etishdi.

O'zbekiston suzish federaciyasi birinchi bor tashkil etilgan Evro Osiyo kubogida Vatanimiz sharafini munosib himoya qilib, sovrindorlar safidan o'rin egallagan sportchilarimizni erishilgan muvaffaqiyat bilan samimiy muborakbod etadi va bo'lajak xalqaro musobaqalarda ham omad va zafarlar tilaydi.