Suzish bo'yicha O'zbekiston ochiq chempionati yakunlandi

Etiborlisi, mazkur nufuzli musobaqada Argentinaning Buenos-Ayres shahrida o'tkaziladigan III yozgi o'smirlar Olimpiya o'yinlariga yo'llanmalar ham o'ynaldi.

Xalqaro suzish federaciyasi shafeligida o'tkazilgan turnirda mamlakatimiz sportchilari qatorida qo'shni Qozog'iston va Qirg'izistondan ham sportchilar qatnashishdi. Musobaqada 400 nafarga yaqin sportchi sovrinli o'rinlar hamda shu yilning 6-18 oktyabr kunlari Argentinaning Buenos-Ayres shahrida o'tkaziladigan III o'smirlar yozgi Olimpiya o'yinlari yo'llanmasi uchun bahs yuritishdi.

Qizg'in kechgan musobaqalar yakunlariga ko'ra bir yo'la besh nafar o'zbekistonlik sportchi o'smirlar o'rtasidagi Olimpiya o'yinlarining yo'llanmalari uchun “A” normativini bajardilar.

Jumladan, 50 metr masafaga brass usulida suzishda Bibigul Minnebaeva va Aleksey Sidorchuk, 50 metr masofaga batterflyay usulida suzishda Mirsaid Mirzoitov, 50 metr masofaga erkin usulda suzish bo'yicha Natalya Kritinina hamda Muhammadjon Abdujalilov muvaffaqiyatli ishtirok etib, III o'smirlar Olimpiya o'yinlarining yo'llanmasi uchun “A” normativini bajarishdi.  

Yana bir malumot. Suzish bo'yicha O'zbekiston qishki ochiq chempionati doirasida xalqaro hakamlar seminari ham o'tkazildi. Mazkur seminarga Xalqaro suzish federaciyasining Yangi Zelandiya va Belarus davlatlaridan taklif etilgan etakchi mutaxassislari rahbarlik qilishdi.

Xalqaro hakamlar seminarida O'zbekistondan 14 nafar, shuningdek, Birlashgan Arab Amirliklari va Indoneziya davlatlaridan hakamlar ishtirok etib, nazariy va amaliy bilimlarini yanada toblab olishdi.

Ikki kunlik seminar yakunlariga ko'ra, hakamlarga Xalqaro suzish federaciyasining mahsus sertifikatlari beriladi. Ushbu seminarda qatnashgan hakamlar endi xalqaro musobaqalarda hakamlik qilishlari mumkin bo'ladi.