Suzish. O'zbekiston kubogida yangi nomlar kashf etilyapti + FOTO

SHu kuni ishtirokchilar 100 metr masofaga brass va chalqancha, shuningdek, 400 metrga erkin va 4x100 metr masofaga erkin usulda suzish bahslarida o'z iqtidorlarini namoyish etdilar.

Avvalo shuni takidlash joizki, navbatdagi kungi bahslar ham murosasiz ruhda kechdi. Etiborlisi, uchinchi kungi bahslarda ham yangidan-yangi nomlar kashf etildi.

Bevosita endi uchinchi kungi bahslarning natijalariga to'xtaladigan bo'lsak, 100 metr masofaga brass usulida suzishda erkaklar orasida jizzaxlik Vladislav Mustafin marraga birinchi bo'lib etib keldi. Ushbu musobaqada Respublika oliy sport mahorati maktabi tarbiyalanuvchisi Iskandar Sadullaev ikkinchi, andijonlik Timur Yazikov uchinchi o'rinni egalladi.

Xuddi shu masofaga chalqancha usulda suzish bo'yicha bo'lib o'tgan musobaqada toshkentlik Aleksey Tarasenko oltin medalga sazovor bo'ldi. Andijonlik Mahmudshox Qodirov kumush, sirdaryolik Mixail Kleshko esa bronza medali bilan taqdirlandi.

400 metr masofaga erkin usulda suzishda erkaklar orasida Navoiy viloyati vakili Olimjon Odilov, ayollar o'rtasida esa Respublika oliy sport mahorati maktabi tarbiyalanuvchisi Anastasiya Zelinskaya shohsupaning eng yuqori pog'onasiga ko'tarilishdi.

Va nihoyat, 4x100 metr masofaga erkin usulda suzish musobaqasida erkaklar va ayollar o'rtasida g'oliblik Navoiy viloyati jamoasiga nasib etdi. Erkaklar o'rtasidagi musobaqada ikkinchi va uchinchi o'rinlarni mos ravishda Toshkent shahri va Andijon viloyati jamoalari band etishgan bo'lsa, xotin-qizlar musobaqasida andijonliklar kumush, poytaxtlik sportchilar esa bronza medaliga sazovor bo'lishdi.