Taekvondo ITF: Yunusobod sport majmuasida O'zbekiston chempionlari aniqlandi

CHempionatda ishtirokchilar taekvondo ITFning shaxsiy massogi, jamoaviy massogi va shaxsiy tul yo'nalishlari bo'yicha o'zaro bahslashdi. Sportni rivojlantirish vazirligi va O'zbekiston taekvondo ITF milliy associaciyasi tashabbusi bilan o'tkazilgan mazkur musobaqada respublikamizning barcha hududlaridan kelgan 1 500 nafardan ortiq sportchi g'oliblik uchun kurash olib borishdi.

Musobaqada terma jamoa azolari yana bir marotaba ko'rikdan o'tkazilib, shu yil 1-5 iyun kunlari Italiyaning Sardiniya orolida o'tkazilishi rejalashtirilgan Jahon chempionati uchun eng munosib sportchilar saralab olindi.

CHempionatning tantanali ochilish marosimi yuqori saviyada tashkil etilib, unda Milliy gvardiya askarlari tomonidan namoyish etilgan ko'rgazmali chiqishlar yig'ilganlarda iliq taassurot qoldirdi. Tadbirda Sportni rivojlantirish vaziri o'rinbosari SHaxrullo Mahmudov hamda O'zbekiston Milliy olimpiya qo'mitasi Bosh kotibi Oybek Kasimovlar ishtirok etishdi.

O'z navbatida tadbir doirasida O'zbekiston taekvondo ITF milliy associaciyasi rahbariyati tomonidan yurtimizda ushbu sport turini rivojlantirishga munosib hissa qo'shayotgan bir guruh insonlar munosib rag'batlantirildi.

Ikki kun davom etgan qizg'in va murosasiz bahslar yakuniga ko'ra umumjamoa hisobida 1-o'rin Toshkent viloyati jamoasiga nasib etdi. Toshkent shahri vakillari esa 2-o'ringa sazovor bo'ldi. Keyingi o'rinlardan Buxoro hamda Sirdaryo viloyati yosh taekvondochilari joy olishdi.

Eslatib o'tamiz, 10-15 may kunlari milliy terma jamoa azolari AQSHning Nyu-York shahrida bo'lib o'tadigan xalqaro musobaqada to'liq tarkib bilan ishtirok etishadi.