Taekvondo. Toshkentda Jahon chempionatining tantanali ochilish marosimi bo'lib o'tdi + FOTOGALEREYA

Ushbu musobaqada sayyoramizning 67 ta mamlakatidan kelgan 850 dan ortiq sportchi hamda murabbiy ishtirok etmoqda. 

Biroz oldin "Universal" sport majmuasida Jahon chempionatining tantanali ochilish marosimi bo'lib o'tdi. Ochilish marosimida kecha yurtimizga tashrif buyurgan Butunjahon taekvondo federaciyasi prezidenti CHungvon CHoy so'zga chiqdi va o'z nutqini o'zbekchada "Assalomu alaykum" deb boshlagani majmuaga yig'ilganlarning olqishiga sabab bo'ldi. 

"Barcha ishtirokchilarni musobaqa ochilish marosimi bilan muborakbod etaman. Sizlar allaqachon g'olibsizlar, sababi Jahon chempionatida ishtirok etishning o'zi katta g'alaba. Ushbu musobaqada qatnashayotgan taekvondochilarga 2020 yil Tokiodagi yoki 2024 yil Parij mezbonlik qiladigan Olimpiadaga chiqishlarini tilayman. SHuningdek O'zbekiston taekvondo WTF associaciyasiga yaqinda tayinlangan yangi rahbar SHerzod Toshmatovga omad va zafarlar tilayman", - dedi CHungvon CHoy. 

SHundan so'ng O'zbekiston bosh vaziri o'rinbosari Aziz Abduhakimov so'zga chiqdi: 

"Butunjahon taekvondo federaciyasi prezidenti janob CHungvon CHoy O'zbekistonga xush kelibsiz. Toshkent mana shunday nufuzli musobaqani qabul qilganidan xursandmiz. Barcha ishtirokchilarni boshlangan Jahon chempionati bilan muborakbod etaman. Toshkentdagi mana shu musobaqada 1000ga yaqin qatnashchi g'oliblik uchun kurash olib bormoqda. Bugungi kunda O'zbekistonda taekvondo sport turi bilan 20000dan ziyod kishi shug'ullanyotgani quvonarli hol albatta".  

So'ngra rasmiy qasamyod marosimi bo'lib o'tdi. Unda hakam, murabbiy, o'g'il bola taekvondochi va qiz bola taekvondochi ishtirok etib musobaqada halollik birinchi o'rinda bo'lishiga qasamyod qilishdi. 

Ochilish marosimi ajoyib koncert dasturi bilan davom ettirildi. 

O'zbekiston taekvondo federaciyasi matbuot xizmati

Foto: Tolibjon Qosimov