Taekvondochilarimizdan onlayn mashg'ulot va master-klass

Kecha ikki sport turida onlayn musobaqalar start olgan bo'lsa, O'zbekiston taekvondo WT associaciyasi tomonidan onlayn tadbirlar o'tkazildi. Ulardan biri kunning birinchi yarmida terma jamoa trenerlari ishtirokida Respublikamizning Qashqadaryo, Surxondaryo va Navoiy viloyatlarida faoliyat olib borayotgan hamkasblar uchun onlayn master-klass tashkil qilindi.

Unda asosiy jamoa ustozi Aleksandr Kim hamda o'smirlar jamoasi murabbiyi Sobir Nazaraliev o'z bilim va mahoratlari bilan o'rtoqlashishdi. Ushbu viloyatlardagi yosh taekvondochilarning mashg'ulotini kuzatib, texnikani oshirish borasida tegishli ko'rsatmalarini berib o'tishdi. So'ng murabbiylar uchun terma jamoada faoliyat olib borayotgan koreyalik mutaxassis Kim Yung Jing metodikasi asosida ishlangan zamonaviy taktik va texnik usullarni o'zida mujassamlashtirgan videorolik qo'yib berildi.

Kunning ikkinchi yarmida asosiy terma jamoamiz o'zining onlayn mashg'ulotini olib bordi. O'zbekiston taekvondo associaciyasi bazasida shug'ullanayotgan sportchilarimiz dastlab chigalyozdi mashqlarini bajarishgach, mashg'ulot davomida asosiy qo'llaniladigan zarbalar, himoyaviy taktikalar ustida ishlashdi.