Tarazdagi xalqaro turnirda 20 ta medal qo'lga kiritildi

Baxitjan Tashmetov xotirasiga bag'ishlab o'tkazilgan ushbu ananaviy turnirda mezbonlardan tashqari Tojikiston, Qirg'iziston, Turkmaniston va O'zbekiston sportchilari tatamiga chiqishdi. 

Xalqaro turnirda yurtimiz sharafini Tohir Fayziev murabbiyligidagi jami 21 nafar o'smir dzyudochilarimiz himoya qilishdi. Dzyudochilarimiz Tarazdagi musobaqada jami 20 ta medalga ega chiqishdi.  

Hamyurtlarimizdan Suhrob Po'latov (-50 kg), Javlonbek Xayrullaev (-73 kg), Jahongir Mamatkarimov (-81 kg), Muhammad Mansurov (-90 kg), Muhayyo Axmatova (-40 kg) va Farangiz Rejepova (-57 kg) o'z vazn toifalarida barcha raqiblarini mag'lub etib, oltin medalni qo'lga kiritishdi. 

Sanjar Pardaev (-73 kg), Dilola Dehkambaeva (-48 kg), Islombek Ravshanqulov (+90 kg) va Xosiyat Masharipova (+70 kg) finalga qadar etib borib, kumush medalga sazovor bo'lishdi.  

Sobirjon Karimov (-55 kg), Diyorbek Durmamatov (-50 kg), Jaloliddin Boltabaev (-66 kg), Qahramon Rahmonov (+90 kg), Irisxon Qurbonboeva (-70 kg) singari jami 10 nafar dzyudochimiz bronza medali bilan O'zbekistonga qaytdi. 

Umumjamoa hisobida O'zbekiston terma jamoasi 6 ta oltin, 4 ta kumush, 10 ta bronza medali bilan ikkinchi o'rinni egalladi. Ushbu musobaqa terma jamoamiz azolariga 25-29 sentyabr kunlari Qozog'istonning Almati shahrida o'tkaziladigan kadetlar o'rtasidagi jahon chempionatiga tayyorgarlik vazifasini o'tab berdi.