Tarixni yangilashga yaqin kelgan SHohida Toshkentga bronza medali bilan qaytadi

Ayollar kurashi bo'yicha o'tkazilgan bahslarda tarixni yangilashga juda yaqin kelgan hamyurtimiz SHohida Ahmedova Toshkentga quruq qo'l bilan qaytmaydigan bo'ldi. 57 kg vazn toifasida yurtimiz sharafini himoya qilgan o'smirlar Olimpiadasining kumush medali sovrindori Tokio Olimpiadasi yo'llanmasi uchun kechgan yarim final uchrashuvida hindistonlik Anshu Anshuga imkoniyatni boy berib qo'ygandi. Ahmedova licenzion turnirning bronza medali uchun bo'lib o'tgan bahsda koreyalik Um Jiyunni 4-0 hisobida dog'da qoldirdi.

Eslatib o'tamiz, shu kungacha O'zbekiston ayollar erkin kurashi terma jamoasi to'rt yillikning eng nufuzli musobaqasida ishtirok etmagan. Endi bor umidimiz may oyida Bolgariyaning Sofiya shahrida o'tkaziladigan jahon licenzion turniridan. Ushbu musobaqa Tokio Olimpiadasiga so'nggi licenzion turnir hisoblanadi.