"Tashkent City Mall"da yulduzlar yog'dusi

Ko'tarinki kayfiyat, pozitiv onlarni tuhfa etgan tadbirda Osiyo Olimpiya Kengashi vice-prezidenti Otabek Umarov, O'zbekiston Respublikasi Sport vaziri Adham Ikramov, vazir o'rinbosari SHahrullo Mahmudov, vazir maslahatchisi Avaz Karimov, Milliy olimpiya qo'mitasi Bosh kotibi Oybek Kasimov, MOQ raisi o'rinbosarlari Azizjon Kamilov, SHerzod Tashmatov, Paralimpiya Qo'mitasi raisi Muxtorxon Tashxodjaev va boshqa rasmiylar ishtirok etishdi.

Tadbir avvvalida so'zga chiqqanlar Xalqaro dzyudo kuni bilan barchani qutlab, dzyudochilarimizni yil davomidagi musobaqalar, xususan Parij-2024 Olimpiadasida muvaffaqiyatli tarzda ishtirok etgani bilan tabriklashdi. 

Bayramona tadbirda Olimpiya o'yinlari chempioni Diyora Keldiyorova, Olimpiadaning bronza medali sovrindori Muzaffarbek To'raboev yosh dzyudochilar uchun mahorat saboqlarini namoyish etdi. Savdo majmuasiga yig'ilganlar, shahrimiz mehmonlari murabbiy O'lmas Gulliev shogirdlarining ko'rgazmali chiqishlaridan bahramand bo'lishdi. 

Tadbir ishtirokchilari Olimpiada oilasiga mansub dzyudo sport turi bilan yaqindan tanishish imkoniyatiga ega bo'lishdi. Turli ko'ngilochar shou dasturlar, sportimiz yulduzlari bilan fotosesiya jarayoni barchaga quvonchli lahzalarni taqdim etdi.